واشنگٹن۔ امریکہ کے وزیر خارجہ مائیک پومپیو وسطی یورپ کے ممالک کے ایک ہفتے کے دورے پر چیک ری پبلک پہنچ گئے۔ دورے کے دوران پومپیو سلووینیا آسٹریا اور پولینڈ بھی جائیں گے۔یہ دورہ ٹرمپ انتظامیہ کی اس پالیسی کا حصہ قرار دیا جا رہا ہے جس کا مقصد وسطی یورپ کے ان ملکوں میں چین اور روس کے بڑھتے ہوئے اثر و رسوخ کو کم کرنا ہے۔چیک ری پبلک پہنچنے پر امریکی وزیر خارجہ نے اپنے ہم منصب تھامس پیٹرک سے ملاقات کی اور امریکہ اور چیک ری پبلک کے تعلقات پر تبادلہ خیال کیا۔دورے کے دوران مائیک پومپیو اس عجائب گھر بھی گئے جو جنگِ عظیم دوم کے دوران اس علاقے کو آزاد کرنے کیلئے کیے گئے امریکی اقدامات کی یاد میں قائم کیا گیا تھا۔۔یہ دورہ ایسے موقع پر ہو رہا ہے جب امریکی محکمہ دفاع (پینٹاگان) جرمنی سے تقریباً 12,000 ہزار فوجیوں کو واپس بلانے اور اس کی کچھ تعداد کو پولینڈ اور دوسرے ناٹو ملکوں میں تعینات کرنے کی منصوبہ بندی کر رہا ہے۔
