کھٹمنڈو۔ 13فروری (سیاست ڈاٹ کام) امریکہ کی کرکٹ ٹیم ورلڈ کپ لیگ کے ونڈے میچ میں نیپال کے خلاف12 اوورز میں صرف 35 رنز پر آل آوٹ ہو گئی جوکہ ونڈے کی تاریخ کا سب سے کم اسکور ہے ۔ امریکی ٹیم ونڈے میچ میں سب سے کم اسکور بنانے والی زمبابوے کے برابر آگئی۔اس سے قبل کرکٹ کی تاریخ میں سب سے کم ترین اسکور کا منفی ریکارڈ زمبابوے کے پاس تھا۔ وہ نڈے میں سری لنکا کے خلاف صرف 35 رنز پر ڈھیر ہوگئی تھی، اب اس فہرست میں امریکی کرکٹ ٹیم کا نام بھی شامل ہو گیا ہے۔ زمبابوے کی ٹیم 2004ء میں سری لنکا کے خلاف اپنے ہی میدان پر 18 اوورز میں صرف 35 رنز بناکر پویلین لوٹ گئی تھی۔کھٹمنڈو میں کھیلے گئے ورلڈ کپ لیگ میچ میں نیپال نے ٹاس جیت کر پہلے بولنگ کا فیصلہ کیا جو کہ میزبان کے لیے سازگار رہا، 50 اوورز کے میچ میں نیپال نے 12 اوورز کے اندر مہمان ٹیم کوکم ترین اسکور پر پویلین لوٹا دیا۔ نیپال کی جانب سے لیگ اسپنر سندیپ لمی چانے نے 16 رنز کی عوض 6 امریکی کھلاڑیوں کوآوٹ کیا جبکہ ایک اوراسپنر سشان بھاری نے صرف 5 رنز دے کر 4 وکٹ حاصل کی۔ امریکی ٹیم کی طرف سے اوپنر مارشل سب سے زیادہ 16 رنز بنائے جبکہ دیگر کوئی کھلاڑی دوہرے ہندسے میں بھی داخل نہیں ہوسکا۔کم ترین ہدف کے تعاقب میں نیپال کے دونوں اوپنر 2 رنز کے مجموعی اسکور پر پویلین لوٹ گئے تھے لیکن بعد میں آنے والے دونوں کھلاڑیوں نے غلطی کئے بغیر 35 رنزکا ہدف 2 وکٹوں کے نقصان پر 5.2 اوور میں حاصل کرلیا۔
