جنگ روکنے کے لئے کارروائی کی گئی: ٹرمپ
واشنگٹن۔4جنوری ۔(سیاست ڈاٹ کام) امریکہ کی ایران کے اسلامی پاسداران انقلاب کورپس کے میجر جنرل قاسم سلیمانی کو ہلاک کرنے کے فیصلے کو قانونی طور پر جائز قرار دیتے ہوئے امریکہ کے قومی سلامتی کے مشیر رابرٹ او برائن نے کہا ہے کہ امریکی کارروائی قانون کے مطابق کی گئی۔ برائن نے کہا کہ یہ کارروائی 2002 کے فوجی طاقت کے استعمال کے لئے اتھارٹی (اے یو ایم ایف) کے تحت پوری طرح درست کارروائی ہے ۔انہوں نے ایران کو بات چیت کرنے کا پیغام دیا اور کسی بھی طرح کی جوابی کارروائی کے خلاف ایرانی قیادت کو سخت انتباہ بھی جاری کیا۔دوسری طرف امریکہ کے صدر ڈونالڈ ٹرمپ نے ایران کی اسلامی پاسداران انقلاب کورپس کے میجر جنرل قاسم سلیمانی کو مارنے کے فیصلے پر وضاحت دیتے ہوئے کہا کہ ان کی یہ کارروائی جنگ کو روکنے کیلئے تھی نہ کہ آغاز کرنے کے لئے۔ ٹرمپ نے کہا کہ امریکہ کی ایران کے سلیمانی کے خلاف جمعہ کے روز کی گئی کارروائی جنگ ختم کرنے کے لئے تھی نہ کہ جنگ کو شروع کرنے کے لئے ’’۔انہوں نے خبردار کرتے ہوئے کہا کہ امریکہ اپنے شہریوں کی حفاظت کے تئیں محتاط ہے اور اگر ایران نے کسی بھی شہری کو نقصان پہنچایا تو جو بھی کارروائی کرنی پڑی اس کے لئے وہ تیار ہیں۔