ترواننت پورم۔ 10 جنوری (یو این آئی) وزیر داخلہ اور بی جے پی کے سینئر رہنما امیت شاہ ریاست میں ہونے والے آئندہ اسمبلی انتخابات کے لیے 11 جنوری کو بی جے پی کی انتخابی مہم کا باضابطہ آغاز کرنے کے لیے کیرالہ کا دورہ کریں گے ۔ اپنے دورہ کے دوران، شاہ کوڈیار کے ’ادے پیلس کنونشن سینٹر‘میں بلدیاتی انتخابات میں جیتنے والے بی جے پی نمائندوں کے ساتھ ایک میٹنگ کریں گے ۔ توقع ہے کہ وہ پارٹی رہنماؤں اور کارکنوں کے ایک بڑے اجتماع سے خطاب بھی کریں گے ، کیرالہ کے لیے بی جے پی کے سیاسی روڈ میپ کی وضاحت کریں گے اور نچلی سطح پر پارٹی کی تنظیمی تیاریوں کا جائزہ لیں گے ۔ اس مہم کے آغاز کا مقصد پارٹی کیڈر میں جوش و خروش پیدا کرنا اور تمام حلقوں میں اپنی رسائی کو مضبوط بنانا ہے ۔ شاہ کے شیڈول میں ریاست کے سینئر رہنماؤں اور پارٹی عہدیداروں کے ساتھ ملاقاتیں بھی شامل ہیں۔ پارٹی رہنماؤں کا کہنا ہے کہ وزیر داخلہ کا یہ دورہ اس لحاظ سے اہمیت کا حامل ہے کہ کیرالہ ایک اہم انتخابی مرحلے کی طرف بڑھ رہا ہے ، جہاں بی جے پی اپنے سیاسی اثر و رسوخ کو بڑھانے اور ریاست کے سیاسی منظر نامہ میں ایک مضبوط متبادل کے طور پر ابھرنے کی کوشش کر رہی ہے ۔