نئی دہلی ، 9 مئی ( سیاست ڈاٹ کام) مرکزی وزیر داخلہ امیت شاہ نے مغربی بنگال حکومت پر مختلف ریاستوں میں درماندہ ریاستی مزدوروں کی واپسی کا بندوبست کرنے میں ناکام رہنے کا الزام عائد کرتے ہوئے وزیر اعلی ممتا بنرجی سے اس معاملے میں تعاون کرنے کو کہا ہے ۔ ذرائع کے مطابق امیت شاہ نے ممتا بنرجی کو ایک مکتوب ارسال کر کے کہا ہے کہ مختلف ریاستوں میں درماند ہ مغربی بنگال کے مزدور اپنی آبائی ریاست جانے کے لئے بے چین اور پریشان ہیں ۔ مرکزی حکومت درماندہ مہاجر مزدوروں کی ان کے گھر جانے میں مدد کر رہی ہے لیکن اسے مغربی بنگال حکومت سے حمایت نہیں مل رہی ہے ۔انہوں نے کہا کہ مرکزی حکومت نے اب تک مختلف ریاستوں کے دو لاکھ سے زائد مہاجر مزدوروں کی ان کی ریاست میں جانے میں مدد کی ہے ۔ مکتوب میں کہا گیا ہے کہ مغربی بنگال حکومت ٹرینوں کے ریاست میں آنے سے متعلق عمل میں تعاون نہیں کر رہی ہے ۔ یہ مغربی بنگال کے مہاجر مزدوروں کے ساتھ ناانصافی ہے ۔ اس سے ان کی مشکلات میں مزید اضافہ ہو جائے گا۔رپورٹوں میں بھی کہا گیا ہے کہ مغربی بنگال کے مزدور مختلف ریاستوں میں انتظامیہ کے لئے بھی پریشانی کا سبب بنے ہوئے ہیں اور ان ریاستوں نے مرکزی حکومت سے انہیں ان کی ریاستوں میں بھیجنے میں تعاون کی درخواست کی ہے ۔
عدم تعاون کا الزام ثابت کریں ، یا معافی مانگیں
اس دوران حکومت مغربی بنگال نے امیت شاہ کے ریمارکس کے پس منظر میں کہا کہ مائیگرینٹ ورکرس کے تعلق سے مرکزی حکومت کی بیان بازی الزام آرائی ہے ۔ امیت شاہ ان کی باتوں کو ثابت کریں یا معذرت چاہیں ۔ سینئر ٹی ایم سی لیڈر اور ممتا بنرجی کے بھانجے ابھیشیک بنرجی نے کہا کہ ریاست پر الزامات غلط ہیں۔