نئی دہلی9دسمبر(سیاست ڈاٹ کام )راجیہ سبھا میں پیر کو دہلی کے رانی جھانسی روڈ پر اناج منڈی علاقے میں فیکٹریوں میں اتوار کو آگ لگنے سے مارے گئے 43لوگوں کو خراج عقیدت پیش کیاگیا۔ایوان کی کارروائی شروع ہونے پر چیئرمین ایم وینکئیا نائیڈو نے اس حادثے پر گہرے دکھ کا اظہار کرتے ہوئے ہلاک شدگان کے گھروالوں کے تئیں گہری تعزیت کا اظہار کیا۔انہوں نے کہاکہ زخمیوں کے علاج کے لئے بہتر انتظام کئے جائیں جس سے کہ وہ جلد صحت مند ہوسکیں اور ایسے حفاظتی انتظامات کئے جائیں تاکہ ایسے حادثے پھر نہ ہوں۔اس کے بعد بھارتیہ جنتا پارٹی کے وجے گوئل نے کہاکہ ایسے حادثے ہوتے رہتے ہیں لیکن انہیں روکنے کے کوئی پختہ انتظامات نہیں کئے جاسکے ہیں۔اپہارسنیما آگ حادثے سے بھی کچھ سبق نہیں لیاگیا۔انہوں نے کہاکہ اس موقع پر ہمیں یہ نہیں کہنا چاہئے کہ اس حادثے کے لئے کون ذمہ دار ہے ،یا اس میں کسی کی ٖغلطی نہیں ہے اور مل جل کر ہمیں ایسے پختہ انتطام کرنے چاہئے جس سے ایسے حادثے دہرائے نہ جائیں۔عام آدمی پارٹی کے سنجے سنگھ نے کہا کہ اس طرح کے حادثے روکنے کے لئے مل جل کر کوشش کرنی ہوگی۔اس موقع پر کسی طرح کی الزام تراشی نہی کی جانی چاہئے ۔انہوں نے کہا کہ اس حادثے کے لئے نہ تو دہلی حکومت او رنہ ہی دہلی میونسیپل کارپوریشن کو قصوروار قرار دیا جانا چاہئے ۔اس طرح کے حادثوں کو روکنے کے لئے مل بیٹھ کر کوئی حل نکالنا چاہئے ۔اس سے پہلے سبھی اراکین نے دو منٹ کے لئے خاموشی اختیار کرکے ہلاک شدگان کو خراج عقیدت پیش کیا۔
