گوہاٹی۔ 16 فروری (یو این آئی) آسام پردیش کانگریس کمیٹی کے سابق صدر بھوپین بورا نے انتخابات سے محض چند ماہ قبل پارٹی سے استعفیٰ دے دیا ہے ، جو کہ پارٹی میں پائے جانے والے انتشار کا واضح اشارہ ہے ۔ بورا جولائی 2021 سے پارٹی کی قیادت کر رہے تھے ۔ انہوں نے اپنا استعفیٰ اے آئی سی سی کی اعلیٰ قیادت بشمول ملکارجن کھڑگے اور راہول گاندھی کو بھیج دیا ہے ۔ بورا 2006 سے 2016 تک آسام قانون ساز اسمبلی میں بہپوریا حلقے کی نمائندگی کر چکے ہیں۔ پارٹی سے استعفیٰ دینے کے بعد بورا نے اپنے سوشل میڈیا ہینڈلز سے اپنا عہدہ بھی ہٹا دیا ہے ۔ بورا کا یہ فیصلہ ایک ایسے وقت میں سامنے آیا ہے جب آسام میں کانگریس نے ریاست بھر کے لوگوں سے رابطہ کرنے کے لیے ’تبدیلی کا سفر‘ شروع کر رکھا تھا۔ بورا، جو رنگا ندی حلقے سے کانگریس کی طرف سے اہم امیدوار بھی تھے ، پارٹی صدر گورو گگوئی کے ساتھ ’پریورتن یاترا‘ میں سرگرمی سے حصہ لے رہے تھے ۔ انہوں نے کہا کہ استعفیٰ کے پیچھے پارٹی کے مستقبل سے متعلق وجوہات ہیں اور انہوں نے پارٹی ہائی کمان کو ان تمام اسباب سے آگاہ کر دیا ہے ۔
