واشنگٹن : سفارتکاروں نے کہا کہ اقوامِ متحدہ کی سلامتی کونسل میں اسرائیل اور حماس کی جنگ میں فوری طور پر انسانی بنیادوں پر جنگ بندی کا مطالبہ کرنے کیلئے الجزائر کی 15 رکنی باڈی کے مطالبہ پر منگل کو ووٹنگ کا امکان ہے جسے امریکہ نے ویٹو کرنے کا اشارہ دیا ہے ۔ الجزائر نے دو ہفتے سے زیادہ عرصہ قبل ایک ابتدائی مسودہ قرارداد پیش کیا تھا لیکن اقوامِ متحدہ میں امریکی سفیر لنڈا تھامس گرین فیلڈ نے فوری طور پر کہا کہ قرارداد کا متن جس کا مقصد جنگ میں وقفہ کرنا تھا، ’’حساس مذاکرات‘‘کو خطرے میں ڈال سکتا تھا۔سفارتکاروں نے بتایا کہ الجزائر نے ہفتہ کو درخواست کی کہ کونسل میں منگل کو ووٹنگ کی جائے ۔ اقوامِ متحدہ کی سلامتی کونسل کی قرارداد کو منظور کرنے کیلئے اس کے حق میں کم از کم نو ووٹوں کی ضرورت ہے اور امریکہ، برطانیہ، فرانس، چین یا روس کی طرف سے کوئی ویٹو نہیں ہونا چاہیے۔ واشنگٹن روایتی طور پر اپنے اتحادی اسرائیل کو اقوامِ متحدہ کی کارروائی سے بچاتا ہے اور 7 اکتوبر سے کونسل کی کارروائی کو پہلے ہی دو بار ویٹو کر چکا ہے ۔
