امریکی پابندیوں کے باوجود روس سے تیل منگوا نے کی ستائش
اسلام آباد: وزیر اعظم عمران خان نے کہا ہے کہ ہندوستان کو داددیتا ہوں جس نے ہمیشہ آزاد خارجہ پالیسی رکھی، امریکی پابندیوں کے باوجود ہندوستان روس سے تیل منگوا رہا ہے۔ خیبرپختونخوا میں جلسہ عام سے خطاب کرتے ہوئے عمران خان کا کہنا تھاکہ یورپی سفیروں نے خط لکھ کر سفارتی پروٹوکول توڑا، کسی سفیر کو حق نہیں پہنچتا ہماری خارجہ پالیسی میں مداخلت کرے، کیا ہم غلام ہیں جو آپ کے کہنے پر روس کی مذمت کریں؟انہوں نے کہا کہ یورپی سفیروں کو ہم نے صحیح کہا کہ کیا آپ ہندوستان سے ایسا کہیں گے؟ عمران خان نے کہا کہ شہباز شریف بوٹ پالش بہت اچھی طرح کرتا ہے، سوٹ پہننے والے ’بے شرم‘ نے تجویز دی ’ایبسلوٹلی ناٹ‘ نہیں کہنا چاہیے تھا، کیا کبھی انہوں نے ڈرون حملوں کی مذمت کی؟ وزیر اعظم نے اپوزیشن رہنماؤں کی طرف اشارہ کرتے ہوئے کہا کہ تین غلاموں نے باہرکے لوگوں کے پاوں پکڑکر سازش کی۔عمران نے کہا کہ سن لو تم یہ میچ بری طرح ہارنے والے ہو۔
