لندن۔6 اپریل (سیاست ڈاٹ کام) سنٹرل کنٹریکٹ شدہ انگلینڈ کے مرد اور خاتون کرکٹروں نے کورونا وائرس وبا سے نمٹنے کے لیے اپنے تنخواہ میں تخفیف کے ذریعے مشکل میں پھنسے ہوئے لوگوں کی مدد کرنے کا فیصلہ کیا ہے۔مرد کرکٹروں نے جہاں اپنے ملازمین اورکچھ امدادی کاموں کیلئے 500,000 پونڈ کی مدد دینے کا فیصلہ کیا ہے وہیں خاتون کرکٹروں نے اپنی تین ماہ کی تنخواہ عطیہ کرنے کا فیصلہ کیا ہے۔انگلینڈ کی خاتون کپتان اتھر نائٹ نے کہاکہ ایسے بحران کی گھڑی میں تمام کھلاڑیوں نے تنخواہ میں تخفیف کرکے ساتھی ملازمین کی اس وبا کے دور میں مدد کرنے کا فیصلہ کیا ہے۔انہوں نے کہاکہ ہمیں معلوم ہے کہ موجودہ وقت میں کھیل کس طرح متاثر ہو رہا ہے اور ہم ہر ممکن مدد کرنے کی کوشش کر رہے ہیں۔ ہم آنے والے ہفتوں میں مدد کی اورکوششوں پر انگلینڈ اینڈ ویلزکرکٹ بورڈ (ای سی بی) سے بات چیت کریں گے۔بین الاقوامی کرکٹ کونسل (آئی سی سی) کی طرف سے جاری رپورٹ میں کہا گیا ہے کہ ابھی تک انگلینڈ کے کھلاڑی انفرادی طور پرکورونا سے نمٹنے میں مدد کے لئے آئے ہیں۔
