لندن۔ ورلڈ کپ 2018 میں رسائی سے محروم رہنے والی اٹلی کی ٹیم انگلینڈ کو شکست دے کر یوروکپ کی چمپئن بن گئی۔ تفصیلات کے مطابق اٹلی اور انگلینڈ کی ٹیم کے مابین ویمبلی اسٹیڈیم میں سخت مقابلے کے بعد پنالٹی شوٹس پر میچ کا فیصلہ ہوا، جس کے بعد اٹلی نے دوسری مرتبہ یوروکپ کا خطاب اپنے نام کرلیا۔انگلینڈ نے سیمی فائنل میں اضافی وقت کے دوران ڈنمارک کو ایک کے مقابلے میں 2 گولز سے شکست دے کر فائنل میں رسائی حاصل کی تھی اور فائنل کے آغاز کے دوسرے ہی منٹ میں ہی انگلینڈ کے لوک شا نے گول کر کے ٹیم کو نفسیاتی برتری دلادی، تاہم اٹلی کے لیونارڈو بونیوچی نے میچ کے 67 ویں منٹ میں گول کرکے میچ 1-1 گول سے برابرکردیا اور ٹیم کو دباؤ سے نکال لیا۔دونوں ٹیموں کے مابین جارحانہ مقابلہ ہوا اور پہلے90 منٹ میں 1-1 گول سے برابر رہا جس کے بعد اضافی وقت میں بھی کوئی ٹیم گول نہ کر سکی اور معاملہ پنالٹی شوٹس پر پہنچا۔ پنالٹی شوٹس میں اٹلی نے انگلینڈ کو 2۔3 سے شکست دے کر فٹبال کی یورپی چمپئن شپ اپنے نام کرلی۔ جیت کے بعد تقریب کے دوران اٹلی کے لیونارڈو بونیوچی نے کیمرے میں دیکھتے ہوئے کہا کہ یہ روم آرہا ہے، یہ روم آرہا ہے، دراصل انہوں نے انگلینڈ کی ٹیم کے ترانے کے مشہور گیت یہ گھرآرہا ہے‘ کا مذاق اڑایا ۔کامیابی کا جشن منانے کے لیے اٹلی کے عوام سڑکوں پر نکل آئے۔ خیال رہے کہ عالمی سطح پرکورونا وائرس کے تیزی سے پھیلاؤ کے پیش نظر رواں سال کے اہم فٹبال ایونٹس یوروکپ اورکوپا امریکہ کو ایک سال کے لئے مؤخر کردیا گیا تھا۔
ہینڈز کومب کورونا سے متاثر
لندن ۔ آسٹریلیائی کرکٹر پیٹر ہینڈز کومب بھی کورونا وائرس کا شکار ہوگئے۔ رپورٹس کے مطابق پیٹرہینڈز کومب کاوئنٹی کرکٹ کے لئے انگلینڈ میں ہیں۔ہینڈز کومب مڈل سیِکس کی جانب سے اتوارکو چمپئن شپ گروپ ٹو میچ نہ کھیل سکے۔
