ماسکو۔23 مارچ (سیاست ڈاٹ کام ) عالمی وبا کورونا وائرس کے بے قابو ہونے کی صورت حال کی وجہ سے اس سال جولائی میں جاپان کے ٹوکیو میں ہونے والے اولمپکس کے انعقاد کے حوالہ سے خطرات کے درمیان بین الاقوامی اولمپک کمیٹی (آئی او سی) کے صدر تھامس بیخ نے کہا کہ اولمپکس ملتوی کرنے کا فیصلہ چار ہفتوں کے اندر لیا جائے گا۔ٹوکیو اولمپکس کا انعقاد 24 جولائی سے 9 اگست تک ہونا ہے۔ ایتھلیٹ برادری کے روانہ اپنے مکتوب میں تھامس نے کہا اپنے معاونین کے ساتھ اجلاس میں ہم نے کورونا وائرس کے حوالہ سے دنیا بھر کے حالات اور اولمپک پر اس کے پڑنے والے اثرات کے حوالہ سے بات چیت کی جس میں اسے ملتوی کرنا بھی شامل تھا۔ ہم سلسلہ میں کافی محنت کر رہے ہیں اور ہمیں امید ہے کہ اس بارے میں فیصلہ اگلے چار ہفتوں کے اندر لے لیا جائے گا۔آئی او سی صدر تھامس کے مطابق جاپان میں کورونا وائرس کی وجہ سے حالات بہتر ہونے کے بعد ٹوکیو اولمپکس کے لیے مقررہ وقت میں کروانے کا حوصلہ بڑھا ہے۔ انہوں نے کہا ایک طرف جاپان میں حالات میں بہتری آ رہی ہے اور لوگوں نے اولمپک مشعل کا گرمجوشی سے خیر مقدم کیا ہے۔ اس سے ہمارا یہ مقررہ وقت میں کرانے کے حوالہ سے حوصلہ بڑھا ہے۔ تھامس نے اس کے ساتھ یہ بھی کہا کہ اولمپکس کو منسوخ کرناکمیٹی کے ایجنڈے میں شامل نہیں ہے اور ٹورنمنٹ کی نئی تاریخوں کے بارے میں اس اجلاس میں کوئی بحث نہیں ہوئی ہے۔قابل ذکر ہے کہ عالمی وبا بن چکے کورونا وائرس کی وجہ سے دنیا بھر میںکھیل پروگرام متاثر ہوئے ہیں اوراولمپک کے انعقاد کے حوالہ سے بھی خطرہ پیدا ہوگیا ہے۔ یاد رہے کہ کورونا وائرس سے دنیا بھر میں ہلاک ہونے والوں کی تعداد 15 ہزار ہوچکی ہے اور اس وقت اٹلی سب سے زیادہ متاثر ہے۔
