نئی دہلی : پارلیمنٹ کے مانسون سیشن میں پیگاسس، مہنگائی اور کسانوں کے معاملے پر حکومت کے خلاف متحد اپوزیشن جماعتوں کی آج پھر پارلیمنٹ میں دوبارہ میٹنگ ہوئی۔ کانگریس کے سابق صدر راہول گاندھی ، راجیہ سبھا میں اپوزیشن رہنما ملکارجن کھرگے اور لوک سبھا میں کانگریس کے رہنما ادھیر رنجن چودھری کے ساتھ میٹنگ میں اپوزیشن کی 14 جماعتوں کے قائدین نے حصہ لیا ۔ اپوزیشن جماعتوں کے رہنماوں نے جمعہ کو بھی پارلیمنٹ میں ایک میٹنگ کی تھی اور اس کے بعد تمام رہنما کسانوں کی حمایت میں جنتر منتر پہنچے اور ’کسان سنسد‘ میں شامل ہوئے ۔مانسون سیشن میں اپوزیشن جماعتوں کے رہنما حکومت کے خلاف متحد کر اس سے پیگاسس ، کسانوں کے مسئلے اور مہنگائی کے سلسلے میں پارلیمنٹ میں بحث کا مطالبہ کررہے ہیں ۔
