جودھ پور : ثقافت اور سیاحت کے مرکزی وزیر گجیندر سنگھ شیخاوت نے راجستھان اسمبلی میں اپوزیشن کے رویہ کی مذمت کرتے ہوئے کہا ہے کہ جب اپوزیشن کے پاس بحث کے لیے کوئی موضوع نہیں بچا ہے تو وہ اس طرح کے بے بنیاد ایشوز پر تبصرے کرتے ہیں اور کام میں رکاوٹ پیدا کرتے ہیں اور کام کو چلنے نہیں دیتے ۔شیخاوت نے یہ بات ہفتہ کو یہاں اپنی رہائش گاہ پر صحافیوں سے غیر رسمی بات چیت میں کہی۔ اسمبلی میں حکمراں اور اپوزیشن جماعتوں کے درمیان تعطل سے متعلق سوال پر شیخاوت نے کہا کہ یہ یقینی طور پر قابل مذمت ہے ۔ جمہوری نظام میں ایسی باتوں کی کوئی گنجائش نہیں۔ انہوں نے کہاکہ میرا ماننا ہے کہ جمہوری نظام میں اخلاقیات پر عمل کرنا ہر کسی کی ذمہ داری ہے ۔ وہاں نہ کوئی حکمراں پارٹی کا موضوع ہے ، نہ کوئی نان پارٹی کا ایشو اور نہ کوئی اپوزیشن کا مسئلہ ہے ۔ ہر ایک کو اپنے جمہوری وقار کا احترام کرتے ہوئے اس پر کارروائی کرنی چاہیے ۔ تاہم راجستھان کے تناظر میں یا میں لوک سبھا کے نقطہ نظر سے دیکھتا ہوں، مجھے لگتا ہے کہ جب اپوزیشن کے پاس کوئی ایشو نہیں رہ جاتے اور جب ان کے پاس کوئی موضوع بحث کے لئے باقی نہیں بچتا تو وہ اس طرح کے بے بنیاد موضوعات کے حوالے سے اس طرح سے تبصرے کرتے ہیں، کام میں رکاوٹ ڈالتے ہیں، کام نہیں ہونے دیتے ۔
