نئی دہلی: میں تمام لوگوں کو دل کی گہرائیوں سے عید الفطر کی مبارک باد پیش کرتا ہوں۔ اللہ سے دعا ہے کہ یہ عید تمام اہل اسلام کے لئے ، ملک اور اہل وطن کے لئے اور دنیا کے تمام انسانوں کے لئے خوشیوں کا، امن کا اور عدل و انصاف کا پیغام لے کر آئے ۔ عید الفطر خوشی و مسرت کا موقع ہے ۔ اس دن کو جشن اور خوشیوں کے طور پر منانے کی سنت رسول اللہ ﷺ کی ہے ۔ اللہ نے اس دن کو سال کا سب سے بڑا جشن کا دن بنایا ہے یہ باتیں امیر جماعت اسلامی ہند سید سعادت اللہ حسینی نے میڈیا کو جاری اپنے ایک بیان میں اہل وطن کو عید کی مبارکباد دیتے ہوئے کہیں۔انہوں نے کہا کہ بعض لوگ خوشی کے اس موقع پر بھی غم وتاسف کی باتیں کرنے لگتے ہیں۔ دنیا میں ہونے والے حادثات، ظلم و ستم اور ناانصافیوں کا ذکر کرکے کہتے ہیں کہ جب حالات ایسے ہیں تو پھر خوشیاں کیسے منائی جائے ؟ جبکہ واقعہ یہ ہے کہ اللہ کے رسول ؐ نے اپنی زندگی کے تمام مراحل میں چاہے وہ آسانیوں کے مرحلے ہوں یا سختی و پریشانیوں کے ، عید منائی ہے اور اس دن کو خوشیوں اور جشن کے طور پر گزارا ہے ۔ اللہ نے اس ماہ مبارک میں قرآن کو نازل فرمایا اور نوع انسانیت کو رشدو ہدایت کا نور عطا فرمایا۔ اللہ کی یہ کتاب بنی نوع انسان کو جینے کا سلیقہ سکھاتی ہے ، فکرو شعور کو صحیح سمت میں لے جاتی ہے اور اس کی آیتوں اور تعلیمات میں ٖ غورو فکر کرنے والوں کو قلبی و ذہنی سکون دیتی ہے ۔یہ اللہ تبارک و تعالیٰ کی طرف سے بندوں کے لئے ایک بڑا انعام ہے ، جس کے شکرانے کے طور پر اہل ایمان عید کی خوشیاں مناتے ہیں۔
