تہران۔ 27 مارچ (سیاست ڈاٹ کام) ایران کے متعدد صوبوں میں سیلابی صورتحال کے باعث اموات کی تعداد30 ہوگئی۔وزارت صحت کے مطابق ایران کے متعدد صوبوں میں سیلابی صورتحال کے باعث اموات کی تعداد30 ہوگئی جبکہ 110 افراد زخمی ہیں۔ایران میں کئی روز کی مسلسل بارش کے بعد مختلف صوبوں میں غیر متوقع سیلابی صورتحال کا سامنا ہے ، موسلا دھار بارش سے سڑکیں دریا کا منظر پیش کرنے لگی ہیں۔سڑکوں پر چلتی گاڑیاں سیلابی ریلے میں بہہ گئیں، مکانات اور انفرااسٹرکچر کو بری طرح نقصان پہنچا ہے ، مسلسل بارش کے بعد متاثرہ علاقوں کی بجلی غائب ہوگئی ہے ۔سیلاب میں گھرے علاقوں میں ایرانی فوج اور پاسداران انقلاب کے گارڈز بھی راحتی کاموں میں شریک ہیں ۔ایران کے صد حسن روحانی نے تمام گورنروں کو الرٹ رہنے کی ہدایت کی ہے ۔مشہد ایئر پورٹ پر پروازوں کی آمدورفت متاثر ہے جبکہ ایرانی محکمہ موسمیات نے مزید بارش کا امکان ظاہر کیا ہے ۔