تہران۔27 مئی (سیاست ڈاٹ کام ) ایران نے دو ماہ کی بندش کے بعد ملک کے بڑے مذہبی مقامات کو دوبارہ کھولنے کا اعلان کیا ہے۔ خبررساں ادارے کے مطابق دارالحکومت تہران میں واقع شاہ عبدالاعظیم کے مقبرے پر آنے والوں کے لیے ماسک کا استعمال لازمی قرار دیا گیا ہے جبکہ آنے والوں کا درجہ حرارت بھی چیک کیا جارہا ہے اور انہیں جراثیم کش گیٹس سے گزارا جا رہا ہے۔ مشہد میں امام رضا کے مزار اور قم میں فاطمہ معصومہ کے مزار اور مسجد جمکران کو بھی دوبارہ کھول دیا گیا ہے۔ یہ مقامات طلوع آفتاب سے ایک گھنٹہ پہلے سے لے کر غروب آفتاب کے ایک گھنٹہ بعد تک کھلے رکھنے کی اجازت دی گئی ہے۔ فروری کے اواخر میں قم میں کورونا وائرس سے پہلی دو اموات کے بعد مارچ میں تمام مزارات، اسکول، یونیورسٹیاں اور دیگر کاروباری مراکز بند کر دیے گئے تھے۔ ایرانی وزارت صحت کے ترجمان کیانوش جہانپور نے کہا کہ ملک میں کورونا وائرس کے معاملات کی تعداد 137,724 تک پہنچ گئی ہے اور اب تک 7,451 ہلاکتیں ہو چکی ہیں۔
