تہران، یکم ؍جولائی (یو این آئی) اسلامی جمہوریہ ایران نے امریکی صدر ڈونالڈ ٹرمپ پر نفسیاتی کھیل کھیلنے کا الزام لگا دیا ہے ۔ وزارت خارجہ کے ترجمان اسماعیل بقائی نے پریس کانفرنس میں کہا کہ امریکہ کے صدر ڈونالڈ ٹرمپ کی باتیں سنجیدہ نہیں ہیں، وہ محض میڈیا اور ذہنی دباؤ کی چالیں چل رہے ہیں۔دفتر خارجہ ایران کا کہنا تھا کہ امریکی صدر کا رویہ مسائل کے حل کی بجائے سیاسی چال بازی ہے ، بیانات مذاکرات یا تنازع کے حل کی سنجیدہ کوشش نہیں، امریکی صدر کے بیانات اعتماد کے ماحول کو نقصان پہنچاتے ہیں۔ایرانی دفتر خارجہ نے کہا کہ تہران پر پابندیوں کے خاتمے پر مسلسل بدلتے مؤقف سے امریکہ کی غیر سنجیدگی واضح ہے ۔ادھر ایرانی سپریم لیڈر آیت اللہ خامنہ ای نے بھی دہرایا ہیکہ ایران کبھی کسی دوسرے ملک کے سامنے نہیں جھکے گا، انھوں نے کہا ہماری ثقافتی دولت امریکہ اور ان جیسے ممالک کے مقابلے میں زیادہ ہے ۔دوسری طرف جی سیون وزرائے خارجہ نے مطالبہ کیا ہے کہ تہران سے نیوکلیئر پروگرام پر مذاکرات بحال کیے جائیں، اور اس کے ساتھ ایٹمی اثاثوں پر مشروط معاہدہ کیا جائے ، ایران کو یورنیم افزودگی کی اجازت نہ دی جائے ، جی سیون نے ایران سے مطالبہ کیا کہ وہ آئی اے ای اے سے مکمل تعاون کرے ۔
