اب تک 2000 افراد ہلاک، 98 بچے بھی مہلوکین میں شامل، صحیح اعداد و شمار ہنوز عدم دستیاب
تہران؍ تل ابیب؍ واشنگٹن ۔ 14 مارچ (ایجنسیز) امریکہ اور اسرائیل کی جانب سے 28 فروری کو ایران پر حملوں کے بعد شروع ہونے والی جنگ میں مشرق وسطیٰ میں اب تک کم از کم دو ہزار افراد ہلاک ہو چکے ہیں۔ خلیجی ممالک جہاں امریکی فوجی اڈے اور اہلکار موجود ہیں اور لبنان بھی اس تنازعہ میں شامل ہو چکے ہیں۔ یہ اعداد و شمار جمعہ تک کے ہیں، جب جنگ کو تقریباً دو ہفتہ ہو چکے ہیں۔ خبر رساں ادارہ روئٹرز ان اعداد و شمار کی آزادانہ تصدیق نہیں کر سکا۔ ایران: سرکاری میڈیا کے مطابق پیر تک کم از کم 1270 افراد ہلاک ہوئے تھے۔ تاہم اقوام متحدہ میں ایران کے سفیر نے چھ مارچ کو کہا تھا کہ جنگ شروع ہونے کے بعد کم از کم 1332 افراد ہلاک ہوئے ہیں۔ ان دونوں اعداد میں فرق کی وضاحت نہیں کی گئی۔ یہ بھی واضح نہیں کہ آیا ان اعداد میں وہ کم از کم 104 افراد شامل ہیں یا نہیں جن کے بارے میں ایرانی فوج نے کہا تھا کہ 4 مارچ کو سری لنکا کے ساحل کے قریب ایک ایرانی جنگی جہاز پر امریکی حملے میں ہلاک ہوئے۔ لبنان: لبنانی حکام کے مطابق اسرائیلی حملوں میں کم از کم 687 افراد ہلاک ہوئے ہیں۔ عالمی ادارہ صحت کے مطابق ہلاک ہونے والوں میں کم از کم 98 بچے شامل ہیں۔ عراق: عراقی صحت حکام کے مطابق کم از کم 30 افراد ہلاک ہوئے ہیں۔ ان میں زیادہ تر ایران نواز شیعہ ملیشیا پاپولر موبیلائزیشن فورسز کے ارکان تھے۔ عراقی بندرگاہ کے قریب تیل بردار جہازوں پر حملے میں ایک غیر ملکی عملے کا رکن بھی مارا گیا۔ اسرائیل: اسرائیلی ایمبولینس سروس کے مطابق 12 افراد ہلاک ہوئے ہیں۔ ان میں 9 افراد یکم مارچ کو بیت شمش میں ایرانی میزائل حملے میں مارے گئے۔ اسرائیلی فوج کے مطابق جنوبی لبنان میں اس کے دو فوجی بھی ہلاک ہوئے۔ امریکہ: امریکہ کے 11 فوجی ہلاک ہوئے ہیں۔ امریکی فوج کے مطابق جمعہ کو عراق کے اوپر ایک فوجی طیارہ گرنے کے بعد چار اہلکاروں کی ہلاکت کی تصدیق کی گئی جبکہ سات دیگر فوجی ایران کے خلاف کارروائیوں کے دوران مارے گئے۔ متحدہ عرب امارات: وزارت دفاع کے مطابق ایرانی حملوں میں 6 افراد ہلاک ہوئے۔ کویت: حکام کے مطابق 6 افراد مارے گئے۔ ان میں دو ایرانی حملوں میں ہلاک ہوئے جبکہ دو وزارت داخلہ کے اہلکار اور دو فوجی شامل ہیں۔ شام: سرکاری خبر رساں ادارے ثناء کے مطابق 28 فروری کو جنوبی شہر سویدہ میں ایک ایرانی میزائل عمارت پر گرنے سے 4 افراد ہلاک ہوئے۔ عمان: صوبہ صحار کے ایک صنعتی علاقے پر ڈرون حملے میں دو افراد ہلاک ہوئے۔ اس کے علاوہ مسقط کے ساحل کے قریب ایک تیل بردار جہاز پر گولہ لگنے سے ایک شخص ہلاک ہوا۔ سعودی عرب: دارالحکومت ریاض کے جنوب مشرق میں واقع الخرج شہر میں ایک رہائشی مقام پر گولہ گرنے سے دو افراد ہلاک ہوئے۔ بحرین: وزارت داخلہ کے مطابق دو الگ ایرانی حملوں میں دو افراد مارے گئے۔ تازہ حملہ دارالحکومت مناما کی ایک رہائشی عمارت پر ہوا۔ فرانس: شمالی عراق میں ڈرون حملے میں ایک فرانسیسی فوجی ہلاک اور چھ زخمی ہوئے۔ یہ فوجی وہاں انسداد دہشت گردی کی تربیت فراہم کر رہے تھے۔