واشنگٹن:امریکہ میں ایشیائی باشندوں پر تشدد، نسل پرستانہ حملوں اور نفرت آمیز مہم کے خلاف سان فرانسسکو، لاس اینجلس اور شکاگو سمیت 60 شہروں میں سیکڑوں افراد نے مظاہرے کیے۔یاد رہے کہ تقریباً دو ہفتے قبل امریکی ریاست جارجیا کے شہر اٹلانٹا میں 3 مساج پارلرز میں فائرنگ سے بیشتر ایشیائی نڑاد خواتین سمیت 8 افراد ہلاک ہوئے تھے۔ میڈیاکے مطابق مظاہرین نے نیویارک، واشنگٹن سمیت اہم شہروں میں مظاہرے کیے کیونکہ امریکہ میں ایشیائی باشندوں کے خلاف حملوں میں نمایاں اضافہ دیکھا گیا ہے۔کورونا وائرس کی وبا کے دوران ایشیائی نڑاد امریکیوں پر حملوں میں اضافہ ہوا جہاں صرف آن لائن ہراساں کیے جانے کے واقعات میں 6 فیصد اضافہ ہواہے۔ہفتے کو احتجاج کرنے والے مظاہرین میں سے ایک لنگ لیو نے کہا کہ ہم امریکی ہیں، ہم ماں ہیں، ہم دوست ہے، ہم یہاں رہتے ہیں، ہم اپنی قوم سے محبت کرتے ہیں، یہ ہم سب پر اثرانداز ہوتا ہے اور ہم کسی کے بھی خلاف تشدد نہیں چاہتے۔احتجاج میں شریک ایک اور خاتون جوڈی چینگ نے کہا کہ ہمیں وبا کو جھیلتے ہوئے ایک سال ہو چکا ہے اور اس دوران ایشیائی باشندوں کے خلاف تشدد میں اضافہ ہوا ہے۔