کریم نگرکارپوریشن کے میئر وائی سنیل راؤ کا مشورہ
کریم نگر۔ ریاستی حکومت کی جانب سے شروع کردہ ایل آر ایس اسکیم کی 31 اکٹوبر آخری تاریخ ہے اس سے استفادہ کرنے کریم نگر کارپوریشن کے میئر وائی سنیل راؤ نے عوام سے خواہش کی ہے۔وہ میونسپل کارپوریشن میں اپنے چیمبر میں منعقدہ پریس کانفرنس میں پرنٹ اینڈ الیکٹرانک میڈیا سے مخاطب تھے۔ میئر نے کہا کہ آخری تاریخ سے قبل درخواست دے کر اپنی جائیدادوں کو باقاعدہ بنالیں۔انہوں نے کہا کہ ایل آر ایس کے بارے میں غلط پروپگنڈہ کیا جارہا ہے اس پر دھیان نہ دیں۔ وائی سنیل راؤ نے مزید بتایا کہ ایل آر ایس اسکیم نئی نہیں ہے بلکہ یہ 2008 میں پہلی بار شروع کی گئی تھی چنانچہ مجلس بلدیہ کارپوریشن میں 2100 درخواستیں آنے پر1783 درخواستوں کی یکسوئی کردی گئی تھی اور 15 درخواستوں کو خارج کردیا گیا اور 315 درخواستیں زیر التواء ہیں۔ مجلس بلدیہ کارپوریشن کو 10.65 کروڑ کی آمدنی ہوئی تھی۔ 2012 سے 2013 تک دوبارہ تاریخ میں توسیع کرتے ہوئے سہولت دی گئی جس کی وجہ سے 1627 درخواستیں حاصل ہونے پر 1295 کی باقاعدہ یکسوئی کردی گئی صرف 24 درخواستوں کو خارج کردیا گیا، 3 ہزار درخواستیں زیر التواء ہیں۔ بطور فیس 12.35 کروڑ کی آمدنی حاصل ہوئی تھی۔ موجودہ صورتحال میں 27 ہزار سے زائد درخواستیں وصول ہوچکی ہیں ۔ عوام کیلئے حکومت نے پھر ایک بار ایل آر ایس کی سہولت فراہم کی ہے اور اس کی آخری تاریخ 31 اکٹوبر مقرر کی گئی ہے۔جنہوں نے تاحال درخواست نہیں دی ہے وہ درخواست دے سکتے ہیں۔ مجلس بلدیہ کریم نگر کے کمشنرنے بھی اس موقع پر مخاطب کیا۔
