د ائیں بازو کی امیدوار میرین لی پن کو شکست‘20برسوں میں کسی صدر کے دوبارہ منتخب ہونے کا اعزاز
پیرس: فرانس کے صدارتی انتخابات میں صدرایمانوئیل میکرون نے میرین لی پن کو شکست دیکر کامیابی حاصل کرلی۔ میڈیا کے مطابق فرانسیسی صدر ایمانوئیل میکرون د ائیں بازو کی امیدوار میرین لی پن کو شکست دیکر اگلے پانچ برسوں کے لیے پھر سے فرانس کے صدر منتخب ہو گئے۔غیر ملکی میڈیا رپورٹس کے مطابق میکرون نے دوسرے راؤنڈ میں 58فیصد ووٹ حاصل کیے جبکہ دائیں بازو کی امیدوار میرین لی پن نے تقریباً 42 فیصد ووٹ حاصل کر سکیں۔ میکرون 20 سال میں پہلے فرانسیسی صدر ہیں جو دوسری مدت کیلئے منتخب ہوئے ہیں۔انتخابات میں کامیابی کے بعد فرانسیسی صدر نے خطاب کرتے ہوئے کہا کہ میں سب کا شکریہ ادا کرتا ہوں ان کا بھی جنہوں نے ووٹ نہیں دیا،میں اب امیدوار نہیں ،سب کا صدر ہوں، میری اگلی 5 سال کی مدت مختلف ہوگی۔ دوسری جانب مارین لی پن نے شکست کو قبول کیا اور پیرس میں حامیوں سے خطاب کرتے ہوئے کہا کہ میں اس نتیجے کو تسلیم کرتی ہوں، تاہم انہوں نے سیاست چھوڑنے کا کوئی اشارہ نہیں دیا بلکہ کہا کہ وہ جون میں ہونے والے قانون سازی کے انتخابات کی تیاری کر رہی ہیں۔برطانوی وزیر اعظم بورس جانس نے ایمانوئیل کو انتخابات میں کامیابی پر مبارکبادیتے ہوئے کہا کہ فرانس ہمارے قریبی اور اہم اتحادیوں میں سے ایک ہے، میں ان مسائل پر مل کر کام جاری رکھنے کا منتظر ہوں جو دونوں ممالک اور دنیا کے لیے اہم ہیں۔ رپورٹس کے مطابق صدارتی انتخاب کے پہلے مرحلے میں 10 اپریل کو ووٹنگ ہوئی تھی اور نتائج کے مطابق صدر ایمانوئیل میکرون نے 27.85 فیصد ووٹ حاصل کرکے پہلی پوزیشن پر رہے۔ دائیں بازو کی امیدوار مارین لی پن نے 23.15 فیصد ووٹ حاصل کرکے دوسرے نمبر پر رہی تھیں۔ میکرون مسلسل دوسری بار صدر بن گئے ۔ یاد رہے کہ2017 کے صدارتی انتخاب میں بھی میکرون اور مارین لی پن کے درمیان مقابلہ ہوا تھا اور دوسرے مرحلے میں میکرون 66 فیصد سے زائد ووٹ لیکر صدر منتخب ہوئے تھے۔