دو افراد گرفتار، عنبرپیٹ، اپل اور آغاپورہ میں ٹاسک فورس کی کارروائی
حیدرآباد : کوویڈ ۔ 19 اینٹی وائرل انجیکشن کی کالہ بازاری اور غیر قانونی فروخت کے خلاف جاری مہم میں پولیس نے آج دو افراد کو گرفتار کرلیا۔ کمشنر ٹاسک فورس کی جانب سے کی گئی کارروائیوں میں ویسٹ زون ٹاسک فورس نے ایک اور ساؤتھ زون ٹاسک فورس نے ایک شخص کو گرفتار کرلیا۔ ساؤتھ زون ٹاسک فورس پولیس نے عنبرپیٹ پولیس کے ساتھ کارروائی کرتے ہوئے اپل علاقہ سے 24 سالہ جے انیل کمار کو گرفتار کرلیا اور اس کے قبضہ سے 4 ریمڈیسور انجیکشن کو ضبط کرلیا۔ انیل کمار ان انجیکشنس کو حاصل کرنے کے بعد زائد قیمت میں فروخت کرنے کی کوشش کررہا تھا کہ خفیہ اطلاع پر کارروائی کرتے ہوئے پولیس نے اُسے گرفتار کرلیا۔ اور ضبط شدہ انجیکشن کے ساتھ عنبرپیٹ پولیس کے حوالے کردیا۔ انسپکٹر ساؤتھ زون ٹاسک فورس راگھویندر نے اپنی ٹیم کے ساتھ کارروائی انجام دی۔ جبکہ ویسٹ زون ٹاسک فورس نے آغاپورہ فنکشن ہال کے قریب ایک شخص 22 سالہ مارتھی راجہ کو گرفتار کرلیا جو کیر ہاسپٹل میں میل نرس کا کام کرتا ہے اور نرسنگ ہاسٹل میں رہتا تھا جس کا تعلق آندھراپردیش سے بتایا گیا ہے۔ ٹاسک فورس ویسٹ زون کے انسپکٹر راجیش نے اپنی ٹیم کے ہمراہ سب انسپکٹر مظفر علی، رنجیت کمار، شیخ قوی الدین و دیگر کے ہمراہ کارروائی کرتے ہوئے راجہ کو گرفتار کرلیا اور اس کے قبضہ سے 14 ریمیڈیسور انجیکشن اور 4 میرفونم انجکشن کو ضبط کرلیا۔