لاس اینجلس : معروف ٹیکنالوجی کمپنی ایپل کے بانیوں اسٹیو جابز اور اسٹیو وزنیاک کی جانب سے تیار کیا جانے والا 45 برس پرانا ایپل کمپیوٹر منگل کو نیلامی کیلئے پیش کیا جا رہا ہے۔ میڈیا کے مطابق ایپل ون کمپیوٹر امریکہ کی ریاست کیلیفورنیا میں 6 لاکھ امریکی ڈالرز میں نیلام ہونے کا امکان ہے۔ایپل ون اْن 200 کمپیوٹرز میں سے ایک ہے جو اسٹیو جابز اور اسٹیو وزنیاک نے کمپنی کی بنیاد رکھنے کے آغاز میں بنائے تھے۔اِن 200 کمپیوٹرز میں سے کچھ کی خاص بات یہ تھی کہ اسے ’کوا کی لکڑی‘ میں بند کیا گیا تھا۔ یہ لکڑی امریکی ریاست ہوائی میں پائی جاتی ہے۔ نیلام گھر کے مطابق اسٹیو جابز اور اسٹیو وزنیاک ایپل ون کو زیادہ تر علیحدہ پارٹس کے طور پر فروخت کرتے تھے۔ ایک کمپیوٹر کی دکان نے ان سے 50 یونٹس کی خریداری کی تھی اور انہوں نے اس میں سے کچھ کو لکڑی میں بند کرنے کا فیصلہ کیا تھا۔
ایپل ون کے ماہر کورے کوہن نے امریکی اخبار لاس اینجلس ٹائمز کو بتایا کہ ’’یہ نایاب الیکٹرانکس کی اشیاء جمع کرنے والوں کیلئے ایک مقدس چیز ہے اور یہ بے شمار لوگوں کے لیے دلچسپ ہے‘‘۔
