حیدرآباد۔ ایک سو سال سے زائد عمر کی خاتون کورونا سے روبہ صحت ہوگئی۔ایک ایسے وقت جب اس وبا سے متاثر ہونے والے اپنی امید کھورہے ہیں، اس خاتون نے عزم اور ہمت کے ساتھ کورونا کا مقابلہ کرتے ہوئے دوسروں کیلئے مثال قائم کردی۔اس خاتون کی کہانی تمام کیلئے ایک جذبہ سے کم نہیں ہے ۔اے پی کے ضلع کرنول کے پداباڑاخانہ سے تعلق رکھنے والی 105سالہ بی موہنماں اس مرض سے روبہ صحت ہوگئی اور ہاسپٹل سے ڈسچارج کردی گئی۔وہ اس عمر میں بھی یوگا کرتی ہے ۔اس کے شوہر کی موت 1991میں ہوئی تھی۔یوگا کے ساتھ ساتھ یہ خاتون اس عمر میں بھی گیان دھیان،روزانہ چہل قدمی بھی کرتی ہے ۔کرنول ضلع میں کورونا کے معاملات میں اضافہ کے پیش نظر والنٹرس کی جانب سے گھر گھر سروے کیاگیا۔یہ سروے 60سال سے زائد عمر کے افراد کے کورونا ٹسٹ کیلئے کیاگیا جس میں پتہ چلا کہ یہ خاتون بھی اس سے متاثر ہوگئی ہے جس کے بعد اس کے رشتہ داروں نے اس کو ہاسپٹل منتقل کیا جہاں اس کا کامیابی کے ساتھ علاج کیاگیا اور یہ خاتون روبہ صحت ہوگئی جس کے بعد اس کوگذشتہ ماہ کی 31تاریخ کو ہاسپٹل سے گھر جانے کی اجازت دے دی گئی۔جب اس سے اس کی صحت کا راز پوچھا گیا تو اس نے دعوی کیا کہ وہ اپنی روزانہ کی عادتوں کی وجہ سے ہی کورونا پر قابو پاسکی۔اس نے کہا کہ وہ ابھی بھی یوگا کرتی ہے ۔یہی اس کی صحت کاراز ہے ۔
