روم : جسے اللہ رکھے اسے کون چکھے، ایک جوڑا ایک ہی دن پیش آئے دو مختلف طیاروں کے حادثات میں معجزاتی طور پر زندہ بچ گیا۔ غیر ملکی میڈیا رپورٹس کے مطابق 30 سالہ اسٹیفانو پیریلی اور ان کی 22 سالہ منگیتر انتونیٹا ڈیماسی نے ہوائی جہاز میں اٹلی کے شہر ٹورین جانے کا منصوبہ بنایا لیکن سفر کیلئے یہ دونوں الگ الگ خانگی طیاروں میں سوار ہوئے۔ میڈیا ذرائع کے مطابق اسٹیفانو پیریلی نے خانگی کمپنی کی خدمات حاصل کیں تاکہ وہ اپنی منگیتر کو ہوائی جہاز کا سفر کروا سکیں کیونکہ انہوں نے اس سے قبل کبھی ہوائی جہاز کا سفر نہیں کیا تھا۔ واضح رہے کہ مذکورہ خانگی کمپنی مختصر سفر کیلئے 2 سیٹر طیارہ پائلٹ کے ہمراہ فراہم کرتی ہے تاکہ شائقین ہوائی سفر کا تجربہ کرسکیں۔ میڈیا رپورٹس کے مطابق پہلے اسٹیفانو پیریلی کے طیارہ نے اڑان بھری اور پھر اسی دن کچھ وقت کے فرق سے ان کی منگیتر انتونیٹا ڈیماسی کا طیارہ بھی ٹورین کیلئے روانہ ہوگیا۔ اڑان بھرنے کے کچھ ہی دیر بعد اسٹیفانو پیریلی کا طیارہ گرگیا جبکہ اس سے کچھ میل کے فاصلے پر موجود انتونیٹا ڈیماسی کے طیارہ کو بھی حادثہ پیش آگیا۔ تاہم فائر فائٹرز نے دونوں حادثوں کی جگہ پر فوری طور پر پہنچ کر نہ صرف اس جوڑے بلکہ ان کے پائلٹس کی بھی جان بچائی۔
