حیدرآباد۔ انسانی ہمدردی کی مثال پیش کرتے ہوئے اے پی کے وزیراعلی وائی ایس جگن موہن ریڈی نے اپنی کاروں کے قافلہ سے آگے ایمبولنس کو گذرنے کا راستہ فراہم کیا۔تفصیلات کے مطابق جگن موہن ریڈی اپنے والد و متحدہ اے پی کے سابق وزیراعلی وائی ایس راج شیکھر ریڈی کی برسی کی تقریب میں شرکت کے بعد کڑپہ ضلع کے پُلی ویندلہ سے گناورم ایرپورٹ کی سمت اپنی گاڑیوں کے قافلہ میں جارہے تھے ، وہ وہاں سے اپنی قیام گاہ جارہے تھے ۔اسی دوران سڑک حادثہ میں زخمی ایک نوجوان کو ایمبولنس کے ذریعہ ہاسپٹل منتقل کیاجارہا تھا۔اس ایمبولنس کو دیکھتے ہوئے جگن موہن ریڈی نے اپنے اہلکاروں کو فوری طورپر ہدایت دی کہ اس ایمبولنس گاڑی کو سڑک سے گذرنے کے لئے راستہ فراہم کیاجائے ۔ان کی ہدایت پر عمل کرتے ہوئے اہلکاروں نے اس ایمبولنس کو راستہ فراہم کردیا۔یہ نوجوان جس کی شناخت شیکھر کے طورپر کی گئی ہے ،اپنی بائیک پر جارہا تھا کہ وہ سڑک حادثہ کا شکار ہوگیا۔اس کو علاج کے لئے وجئے واڑہ کے ای ایس آئی ہاسپٹل بذریعہ ایمبولنس لے جایاجارہا تھا۔ایمبولنس کے لئے راستہ فراہم کرنے کے لئے جگن نے پہلی مرتبہ ہدایت نہیں دی ہے بلکہ قبل ازیں بھی گورنر کی جانب سے دی گئی افطار کی دعوت کے موقع پر بھی حیدرآباد پہنچے جگن نے ایمبولنس کو راستہ فراہم کیا تھا۔
