متاثرہ خاتون کو معاوضہ ادا کرنے عدالت کا حکم
بھوپال: مدھیہ پردیش کی ضلعی صارفین کی عدالت نے بائجوز کے منیجر اور اس کے پروموٹر اور بالی ووڈ اداکار شاہ رخ خان کو ایک خاتون کی شکایت پر دھوکہ دہی اور غیر منصفانہ تجارتی طریقوں کیلئے نوٹس جاری کیا ہے، ان سے معاوضہ ادا کرنے اور فیس کی واپسی کو کہا گیا ہے۔ یہ کارروائی اندور کی ایک خاتون پرینکا دکشت کی شکایت پر کی گئی ہے۔خاتون نے شکایت کی تھی کہ اسے 2021 میں آئی اے ایس کی تیاری کیلئے بائجوز کی کوچنگ (کورس) میں داخلہ لینے کیلئے آمادہ کیا گیا اور اس نے 1.8 لاکھ روپے کی فیس جمع کرائی لیکن اسے کوچنگ کی سہولت نہیں دی گئی۔ انہوں نے الزام لگایا کہ یقین دہانی کے بعد بھی رقم واپس نہیں کی گئی۔ اس کے بعد خاتون نے شکایت درج کرائی اوراداکار شاہ رخ خان کو جواب دہندگان میں سے ایک کے طور پر نامزد کیا تھا جب اس نے 13 جنوری 2021 کے اشتہار سے متاثر ہوکر یو پی ایس سی امتحانات کی تیاری کیلئے فرم کے کوچنگ کورس میں داخلہ لینے کا دعویٰ کیا تھا۔چہارشنبہ کو کیس کی سماعت ہوئی اور ضلع کنزیومر کورٹ نے حکم دیا کہ شکایت کنندہ کی ادا کی گئی رقم واپس کی جائے اور2021 میں داخلہ کے وقت پرینکا کی جمع کرائی گئی فیس 12 فیصد سالانہ سود کے ساتھ واپس کیے جائیں، جبکہ 5000 روپے قانونی چارہ جوئی کی لاگت کے طور پر اور 50000 روپے ذہنی اذیت کے معاوضے کے طور پر دیئے جائیں۔ بائجوز کے مقامی منیجر اور اداکار خان کو مشترکہ طور پر یا الگ الگ رقم دکشت کو ادا کرنی ہوگی۔