لندن،30جنوری (سیاست ڈاٹ کام) یوروپی یونین کی بریگزٹ ڈیل کی توثیق کے ساتھ ہی برطانیہ جمعہ کو یوروپی یونین سے الگ ہو جائے گا۔خبر رساں ایجنسی کے مطابق برطانیہ کو یوروپ سے نکالنے کی ڈیل کے حق میں 621 اور مخالفت میں محض 49 ووٹ آئے۔ رواں ماہ برطانوی وزیراعظم بورس جانسن کا یوروپی یونین سے اخراج کا بل دارالعوام سے منظور کرلیا گیا تھا، دارالعوام میں بریگزٹ بل پر رائے شماری میں 330 اراکین نے بل کے حق میں اور 231 نے مخالفت میں ووٹ دیا تھا۔ جس کے بعد برطانیہ 31 جنوری تک یوروپی یونین سے علیحدہ ہوجائے گا۔واضح رہے کہ برطانیہ میں یوروپی یونین میں رہنے یا اس سے نکل جانے کے حوالہ سے جون 2017 میں ریفرنڈم ہوا تھا، جس میں بریگزٹ کے حق میں 52 فیصد جب کہ مخالفت میں 48 فیصد ووٹ پڑے تھے ۔ ریفرنڈم کے ان نتائج پر اس وقت کے بریگزٹ کے مخالف وزیراعظم ڈیوڈ کیمرون کو عہدہ سے استعفیٰ دینا پڑا تھا۔
