سیاسی انتقامی کارروائی کی شکایت، امتحانی پرچہ کے افشاء اور ضابطہ اخلاق کی خلاف ورزی کا الزام
حیدرآباد ۔ 20۔نومبر (سیاست نیوز) تلنگانہ ہائی کورٹ نے مرکزی مملکتی وزیر داخلہ بنڈی سنجے کمار اور سابق وزیر کے ٹی راما راؤ کو راحت دی ہے ۔ ان دونوں کے خلاف پولیس کی جانب سے دائر کردہ مقدمات کو ہائی کورٹ نے کالعدم کردیا ۔ 2023 میں ایس ایس سی امتحانات کے پرچہ کے افشاء معاملہ میں کملا پور پولیس اسٹیشن میں بنڈی سنجے کے خلاف مقدمہ درج کیا تھا ۔ بنڈی سنجے کے وکیل نے عدالت کو بتایا کہ سیاسی انتقامی کارروائی کے تحت مقدمہ درج کیا گیا ہے ۔ مقدمہ کے سلسلہ میں شواہد کے بغیر ہی مختلف سیکشن عائد کئے گئے ۔ پولیس نے ابتدائی جانچ کے بغیر ہی مقدمہ دائر کیا ۔ فریقین کی سماعت کے بعد ہائی کورٹ نے مقدمہ کو کالعدم کردیا۔ اسی طرح 2023 میں اسمبلی انتخابات کے دوران انتخابی ضابطہ اخلاق کی خلاف ورزی کے الزام میں کے ٹی آر اور جی وینکنا کے خلاف سیف آباد پولیس اسٹیشن میں مقدمہ درج کیا گیا تھا۔ سکریٹریٹ کے روبرو واقع شہیدان تلنگانہ کی یادگار کے قریب اجازت کے بغیر جی وینکنا نے کے ٹی آر کا انٹرویو کیا اور ڈرون کا استعمال کیا گیا تھا ۔ پولیس کی اجازت کے بغیر ڈرون کے استعمال پر مقدمہ درج کیا گیا۔ بی آر ایس کے امیدوار کو فائدہ پہنچانے کیلئے انٹرویو کیا گیا ، اس سلسلہ میں ایف آئی آر درج کی گئی۔ کے ٹی آر کے وکیل نے سیاسی نوعیت کا مقدمہ قرار دیتے ہوئے عدالت سے کالعدم کرنے کی اپیل کی۔ ہائی کورٹ نے کے ٹی آر اور جی وینکنا کے خلاف درج مقدمات کو کالعدم کردیا۔1
