کراچی ۔10 فروری (سیاست ڈاٹ کام ) پاکستان نے بنگلہ دیش کو راولپنڈی میں کھیلے گئے پہلے ٹسٹ میں ایک اننگز اور 44 رنز سے شکست دیدی ہے۔پاکستان کو بنگلا دیش کے خلاف دو ٹسٹ کی سیریز میں 1-0 سے برتری حاصل ہو گئی ہے۔ میچ کی دوسری اننگز میں پاکستان کی جانب سے فاسٹ بولر نسیم شاہ اور لیگ اسپنر یاسر شاہ نے فی کس 4 وکٹ حاصل کیے۔ نسیم شاہ کو پلیئرآف دی میچ کے ایوارڈ سے نوازا گیا ۔ مین آف دی میچ ایوار ڈ حاصل کرتے ہوئے فاسٹ بولر نسیم شاہ نے کہا کہ کہ گھریلو میدان پر کھیلنا بہت اچھا لگا ہے، فٹنس کا ایسا مسئلہ نہیں، کوشش کر رہا ہوں جلد کور کرلوں گا۔ واضح رہے کہ بنگلہ دیش کے خلاف پنڈی ٹسٹ میںمہمان ٹیم اپنی پہلی اننگز میں 233 رنز بناکر آوٹ ہوئی تھی جس کے جواب میں پاکستان نے پہلی اننگز میںبابر اعظم اور شان مسعود کی سنچریوں کی بدولت 445 رنز اسکور کئے تھے۔ اس کے بعد دوسری 212 رنز کے خسارے میں جانے کے بعد دوسری اننگز میں بنگلہ دیش کی پوری ٹیم 168 رنز بنا کر آوٹ ہوگئی اور پاکستان نے میچ ایک اننگز اور 44 رنز کی فتح کے ساتھ اپنے نام کیا۔ بنگلہ دیش کے جانب سے کپتان مومن الحق دوسری اننگز میں 41 رنز کے ساتھ نمایاں رہے۔ دو ٹسٹ میچز کی سیریز میں پاکستان کو 1-0 کی برتری حاصل ہوگئی ہے ، جبکہ سیریز کا دوسرا ٹسٹ اپریل میں کراچی میں ہوگا۔ راولپنڈی ٹسٹ میں کامیابی کے ساتھ ہی پاکستان کو ورلڈ ٹسٹ چمپئن شپ میں مزید60 پوائنٹس مل گئے ہیں جس کے بعد پوائنٹس ٹیبل پر 140 پوائنٹس کے ساتھ اب یہ چوتھے نمبر پر آگئی ہے۔ میچ کے بعد شکست پر تبصرہ کرتے ہوئے بنگلہ دیشی کپتان مومن الحق نے کہا کہ ہارنے پر مایوسی ضرور ہوئی ہے ، پاکستانی بولرز نے اچھا کھیلا ،تاہم اب ہم سیریز کے دوسرے ٹسٹ میں اچھا کھیلنے کی کوشش کریں گے۔ اس سے قبل ٹسٹ میچ کے چوتھے دن بنگلہ دیش نے 6 وکٹ کے نقصان پر 126 رنز سے اپنی نامکمل اننگز کا آغازکیا تو شاہین شاہ آفریدی نے آغاز میں ہی بنگلہ دیشی کپتان مومن الحق کو پویلین واپس بھیج دیا وہ 41 رنز کی اننگز کھیل کر آوٹ ہوئے جس کے بعد روبیل حسین محمد عباس کا شکار بنے اور باقی دو وکٹیں یاسر شاہ کے حصے میں آئیں۔ واضح رہے کہ راولپنڈی ٹسٹ کی خاص بات نوجوان فاسٹ بولر نسیم شاہ کی ریکارڈ ساز ہیٹ ٹرک ہے، انہوں نے 16 سال کی عمر میں یہ کارنامہ انجام دے کر ریکارڈ بک میں اپنا نام درج کروایا ہے۔