ڈھاکہ: بنگلہ دیش کے اسٹار آل راؤنڈر شکیب الحسن کے وارنٹ گرفتاری جاری ہوگئے۔ دو بینک چیکس باؤنس ہونے پر یہ کارروائی کی گئی ہے۔ ڈھاکہ کے ایڈیشنل چیف میٹروپولیٹن مجسٹریٹ ضیاء الدین رحمان نے یہ وارنٹ اتوار کو جاری کیے۔ شکیب نے 2016 میں بنگلہ دیش کے ستکھیرا میں ایک کیکڑے کا فارم بنایا تھاجو 2021 سے بند ہے۔ مذکورہ چیکس بینک سے لیے گئے قرض کی ادائیگی کیلئے تھے جو شکیب کی اس کمپنی نے بینک سے لیا تھا لیکن چیکس ناکافی فنڈز کی وجہ سے باؤنس ہو گئے تھے۔ اکتوبر 2024 میں بنگلہ دیشی بینک نے باؤنس ہونے والے چیکس کے معاملے پر قانونی نوٹس جاری کیا تھا اور بعد میں 24 دسمبر کو شکیب اور ان کی کمپنی کے 3 دیگر عہدیداروں کے خلاف مقدمہ دائر کیا تھا۔ شکیب الحسن سیاسی بدامنی اور عوامی لیگ کے ساتھ وابستگی کے باعث جان سے مارنے کی دھمکیاں ملنے کے بعد بنگلہ دیش سے باہر ہیں۔ وہ گزشتہ سال حکومت مخالف مظاہروں کے دوران نوجوان کے قتل کے مقدمے میں بھی نامزد ہیں۔ دوسری جانب شکیب الحسن کو مشکوک بولنگ ایکشن رپورٹ ہونے پر بولنگ کرنے پر پابندی کا سامنا ہے جبکہ وہ پاکستان اور متحدہ عرب امارات میں چمپئنز ٹرافی کیلئے بنگلہ دیش اسکواڈ سے بھی باہر ہوگئے ہیں۔
