جینوا:عالمی ادارہ صحت (ڈبلیو ایچ او) نے چہارشنبہ کو ہندوستان میں تیار کووڈ ویکسین، یعنی بھارت بایوٹیک کی ’کوویکسن‘ کو ایمرجنسی استعمال کیلئے فہرست بند کرتے ہوئے منظوری دے دی۔ ڈبلیو ایچ او کے تکنیکی مشاورتی گروپ (ٹی اے جی) نے اس بارے میں اپنا فیصلہ سنایا۔ڈبلیو ایچ او نے ایک ٹوئٹ میں لکھا ہے ’’ڈبلیو ایچ او نے بھارت بایوٹیک کے ذریعہ تیار کوویکسن کو ایمرجنسی استعمال کی فہرست (ای یو ایل) میں شامل کیا ہے۔ اس سے ڈبلیو ایچ او کے ذریعہ کووڈ۔19 کی روک تھام کے لیے قابل قبول ٹیکوں کا پورٹ فولیو بڑھا ہے۔‘‘بتایا جاتا ہے کہ ڈبلیو ایچ او کی ایمرجنسی فہرست میں کوویکسین کو شامل کرنے میں تاخیر ہو گئی، کیونکہ ٹی اے جی نے آخری جوکھم جائزہ کے لیے ٹیکہ بنانے والوں سے کچھ اضافی معلومات طلب کی تھیں۔ ٹی اے جی کا آخری اجلاس 27 اکتوبر کو ہوا تھا اور ویکسین سازوں سے اضافی ڈاٹا حاصل کرنے کے بعد آخری جوکھم کاجائزہ کرنے پر ہی اس کے استعمال پر اتفاق ظاہر کیا تھا۔ یہاں یہ تذکرہ بیجا نہ ہوگا کہ کوویکسین کو تلنگانہ کے دارالحکومت حیدر آباد میں واقع بھارت بایوٹیک کے ذریعہ حکومت کی ہندوستانی میڈیکل ریسرچ کونسل (آئی سی ایم آر) کے تعاون سے تیار کیا گیا ہے۔ اسے جنوری میں ملک میں ایمرجنسی استعمال کے لیے منظوری دی گئی تھی۔ کوویکسن کو مرض انڈکیٹر کووڈ۔19 کے خلاف 77.8 فیصد اثردار اور نئے ڈیلٹا ویرینٹ کے خلاف 65.2 فیصد محفوظ مانا گیا ہے۔ بھارت بایوٹیک نے کہا کہ اس نے تیسرے مرحلہ کی ٹیسٹنگ سے کوویکسن کے اثر کے آخری تجزیہ کا نتیجہ نکالا ہے۔
