نئی دہلی۔ 4نومبر (یو این آئی) ہندستان کے الیکشن کمیشن نے آج نئی دہلی میں انڈیا انٹرنیشنل انسٹی ٹیوٹ فار ڈیموکریسی اینڈ الیکشن مینجمنٹ (آئی آئی آئی ڈی ای ایم) میں بین الاقوامی الیکشن وزیٹرس پروگرام 2025 کا آغاز کیا۔ چیف الیکشن کمشنر گیانیش کمار اور الیکشن کمشنر ڈاکٹر وویک جوشی نے شرکاء سے بات چیت کی۔ افتتاحی اجلاس میں فرانس، جنوبی افریقہ، بیلجیم، انڈونیشیا، فلپائن، تھائی لینڈ اور کولمبیا کے 14 شرکاء نے شرکت کی۔ شرکاء کو ای وی ایم کا مشاہدہ کرایا گیا جس کے بعد ای سی آئی کے سینئر افسران نے انتخابی فہرستوں کی تیاری اور ہندوستان میں انتخابات کے انعقاد سمیت انتخابات کے مختلف پہلوؤں پر پریزنٹیشن دی۔ آی ای وی پی میں 5سے 6نومبر 2025تک بہار کا دو روزہ دورہ شامل ہے جہاں شرکاء ای وی ایم ڈسپیچ مراکز کا دورہ کریں گے اور 6 نومبر 2025کو اصل پولنگ کا مشاہدہ کریں گے ۔ سال 2014 سے آی ای وی پی ہندوستان کے انتخابی نظام کی طاقتوں کو بین الاقوامی برادری کے سامنے پیش کر رہا ہے اور انتخابات کے انعقاد کیلئے دنیا کی سب سے بڑی جمہوریت میں اپنائے گئے بہترین طریقوں کا اشتراک کر رہا ہے ۔ آی ای وی پی دیگر ممالک اور بین الاقوامی تنظیموں کے الیکشن مینجمنٹ باڈیز کے ساتھ بین الاقوامی تعاون اورشمولیت کیلئے ای سی آئی کا ایک فلیگ شپ پروگرام ہے ۔
