ایک ہلاک، درجنوں بیمار ،علاقہ میں افراتفری
پٹنہ: بہار کے حاجی پور شہر میں دودھ اور آئس کریم پلانٹ سے امونیا گیس کے اخراج سے ایک شخص کی موت ہو گئی اور دو درجن سے زیادہ بیمار ہو گئے۔ واقعہ ہفتہ کی دیر رات پیش آیا۔ متوفی دیناناتھ سنگھ حاجی پور شہر میں راج دودھ اور ڈیری پروڈکٹس پلانٹ کا ملازم تھا اور پٹنہ ضلع کے مانیر کا رہنے والا تھا۔ پلانٹ میںگیس کا اخراج رات 9.45 بجے کے قریب شروع ہوا۔ وہاں موجود دو درجن سے زائد ملازمین سانس لینے میں دشواری کے باعث بے ہوش ہوگئے۔ گیس لیک ہونے کے بعد مقامی لوگ وہاں سے بھاگنے لگے۔ کچھ دیر تک بھگدڑ جیسی صورتحال رہی اور افراتفری کا ماحول دیکھا گیا تاہم ضلعی انتظامیہ نے حالات کو قابو میں کر لیا۔ ویشالی کے ضلع مجسٹریٹ یشپال مینا نے کہا کہ ہمیں پلانٹ سے امونیا گیس کے اخراج کی اطلاع موصول ہوئی اور فوری طور پر بچاؤ آپریشن شروع کیا گیا۔پٹنہ کی فائر بریگیڈ اور کیو آر ٹی کے ساتھ ضلع پولیس نے فوراً موقع پر پہنچ کر بے ہوش ملازمین کو باہر نکالا۔ انہیں صدر اسپتال حاجی پور میں داخل کرایا گیا۔ ڈسٹرکٹ فائر حکام نے امونیا گیس کے اثر کو کم کرنے کے لیے متاثرہ علاقے میں پانی کا چھڑکاؤ کیا۔ ویشالی کے سیول سرجن نے دعویٰ کیا کہ صورتحال قابو میں ہے اور بیمار افراد کا علاج کیا جا رہا ہے۔
