خصوصی جامع نظرثانی کے عمل کو واپس لینے کا مطالبہ، ایوان کے وسط میں احتجاج، ایس آئی آر کیخلاف نعرے
نئی دہلی، 7 اگست (یو این آئی) اپوزیشن جماعتوں کے ارکان کے ہنگامے کی وجہ سے لوک سبھا کی کارروائی دن بھر کے لئے ملتوی کر دی گئی۔ جیسے ہی دو التوا کے بعد دوپہر 2 بجے کارروائی شروع ہوئی، اپوزیشن پارٹیوں کے ارکان نے بہار میں ووٹر لسٹ کے خصوصی جامع نظر ثانی (ایس آئی آر) کے عمل کو واپس لینے کا مطالبہ کرتے ہوئے ہنگامہ شروع کردیا۔ کچھ ارکان ایوان کے وسط میں آ گئے اور شور شرابہ کرنے لگے ۔ کئی ارکان نے ہاتھوں میں پلے کارڈز اٹھا رکھے تھے جن پر ایس آئی آر کے خلاف نعرے درج تھے ۔ پریزائیڈنگ آفیسر جگدمبیکا پال نے ارکان سے کہا کہ وہ ہنگامہ نہ کریں، کیونکہ منی پور سے متعلق بل پاس ہونے ہیں، وہ اپنی اپنی نشست پر جائیں اور کارروائی کو ہموار طریقے سے چلنے دیں۔ ہنگامے کے درمیان منی پور سے متعلق دو بل منظور کئے گئے ۔ بلوں کی منظوری کے بعد، مسٹر پال نے دوبارہ اراکین سے اپیل کی کہ وہ ہنگامہ بند کریں اور کارروائی کو خوش اسلوبی کے ساتھ چلنے دیں لیکن ان کی اپیل کا کوئی اثر نہیں ہوا اور اپوزیشن جماعتوں کے اراکین شور و غل مچاتے رہے ۔ جب ہنگامہ نہیں رکا تو مسٹر پال نے ایوان کی کارروائی جمعہ کی صبح 11 بجے تک ملتوی کر دی۔ اس سے قبل جیسے ہی اسپیکر اوم برلا نے گیارہ بجے ایوان کی کارروائی شروع کی اور وقفہ سوال کا آغاز کیا تو اپوزیشن ارکان اپنے ہاتھوں میں پلے کارڈز لے کر ایوان کے وسط میں آگئے اور نعرے لگاتے ہوئے ہنگامہ آرائی شروع کردی۔ ہنگامہ آرائی کے درمیان انہوں نے اربن ہاؤسنگ منسٹری سے متعلق سوال پر ایوان کی کارروائی چلانے کی کوشش کی لیکن شور شرابے کی وجہ سے کچھ سنائی نہیں دیا۔ شہری مکانات کے وزیر منوہر لال نے تفصیل سے جواب دینے کی کوشش کی لیکن ہنگامہ آرائی کی وجہ سے ایوان میں کچھ بھی سنائی نہیں دیا۔ مسٹر برلا نے ہنگامہ کررہے اراکین سے کہا کہ جب حکومت ان کی بات سننے کے لیے تیار ہے اور وہ بھی پارلیمنٹ کے ضوابط کے تحت ہر مسئلہ پر بحث کی اجازت دے رہے ہیں تو اراکین کو ہنگامہ نہیں کرنا چاہیے ۔ وقفہ سوال ایک اہم وقت ہوتاہے ، اراکین کوعوام نے منتخب کرکے بھیجا ہوتا ہے ۔ انہوں نے کہا کہ میں آپ سے روزانہ ایوان چلانے کی درخواست کرتا ہوں لیکن آپ روزانہ منصوبہ بند طریقے سے ایوان میں خلل ڈالتے ہیں۔ ضابطے کے مطابق ایوان کی کارروائی کو چلانا ہم سب کی ذمہ داری ہے ۔ ملک کے لوگ دیکھ رہے ہیں کہ اپوزیشن ارکان ایوان میں ہنگامہ آرائی کر کے وقار کی پاسداری نہیں کر رہے ، میری تمام اراکین سے درخواست ہے کہ وہ اپنی اپنی نشستوں پر جائیں اور ایوان کی کارروائی میں شرکت کریں۔جب برلا کی درخواست کا ہنگامہ کرنے والے ارکان پر کوئی اثر نہیں ہوا اور ہنگامہ بڑھتا ہی گیا تو انہوں نے ایوان کی کارروائی 12 بجے تک ملتوی کر دی۔
ایک بار التوا کے بعد جیسے ہی 12 بجے کارروائی شروع ہوئی، اپوزیشن ارکان ایوان کے وسط میں آگئے اور نعرے بازی شروع کردی۔ پریزائیڈنگ آفیسر سندھیا رائے نے ہنگامہ آرائی کے درمیان ضروری کاغذات میز پر رکھوائے ۔ وزیر خزانہ نرملا سیتا رمن نے شور شرابے کے درمیان منی پور گڈز اینڈ سروسز ٹیکس (ترمیمی) بل 2025 پیش کیا۔
پریزائیڈنگ افسر نے ہنگامہ کرنے و الے ارکان سے اپنی نشستوں پر جانے اور ایوان کو چلانے کی درخواست کی۔ پریزائیڈنگ افسر کی درخواست پر بھی ہنگامہ آرائی نہیں رکی، جس کے باعث ایوان کی کارروائی دوپہر 2 بجے تک ملتوی کر دی گئی۔