نئی دہلی: جنتا دل یونائیٹڈ کے لیڈر بہار کو خصوصی ریاست کا درجہ دینے کا مسلسل مطالبہ کر رہے تھے۔ لیکن بہار کے چیف منسٹر نتیش کمار کی پارٹی کو آج آخری جواب مل گیا ہے۔ اس جواب میں کہا گیا کہ بہار کو خصوصی ریاست کا درجہ نہیں مل سکتا۔ جے ڈی یو کے ایم پی رام پریت منڈل کے سوال کے جواب میں پنکج چودھری نے تحریری جواب میں کہا کہ بہار کو خصوصی ریاست کا درجہ نہیں مل سکتا۔وزیر مملکت برائے خزانہ پنکج چودھری نے مرکزی حکومت کی جانب سے جواب دیتے ہوئے کہا کہ بہار کو خصوصی ریاست کا درجہ دینا ممکن نہیں ہے۔ اس کے ساتھ ہی مرکزی وزیر مملکت نے کہا کہ خصوصی درجہ کیلئے جو دفعات کو پورا کرنا ہوتا ہے وہ بہار میں نہیں ہیں۔ گزشتہ کچھ سال سے بہار کو خصوصی ریاست کا درجہ دینے کا مطالبہ مسلسل اُٹھایا جا رہا ہے۔ اب سربراہ آر جے ڈی لالو پرساد یادو نے بھی اس معاملے پر اپنا رد عمل ظاہر کیا ہے اور سی ایم نتیش کمار پر سخت نشانہ لگایا ہے۔ انہوں نے کہا کہ نتیش کمار کو چیف منسٹر کے عہدہ سے استعفیٰ دے دینا چاہئے ۔ ہندوستانی آئین کے آرٹیکل 275 کے مطابق کسی بھی ریاست کو خصوصی درجہ دینے کا انتظام ہے۔ اس وقت ملک میں کل 29 ریاستیں اور 7 مرکز کے زیر انتظام علاقے ہیں۔ ان میں سے 11 ریاستیں ایسی ہیں جنہیں خصوصی ریاست کا درجہ ملا ہے۔
