مدھے پورہ، 29 اکتوبر (یواین آئی) سوراج کے بانی پرشانت کشور نے بدھ کو مدھے پورہ میں منعقد ایک عوامی جلسے میں بڑا بیان دیتے ہوئے کہا کہ بہار کی آئندہ سیاسی لڑائی قومی جمہوری اتحاد(این ڈی اے ) سے ہے ۔ اس دوران انہوں نے راشٹریہ جنتا دل (آر جے ڈی) اور اپوزیشن لیڈرتیجسوی پرساد یادو پر سخت حملہ کرتے ہوئے آر جے ڈی کو عوام کی مشکلات کا ذمہ دار قرار دیا۔ پرشانت کشور نے کہاکہ اب عوام فیصلہ کرے کہ کیا وہ بہار میں جنگل راج کو واپس لانا چاہتے ہیں یا سوراج کی حمایت کرکے نیا نظام قائم کرنا چاہتے ہیں۔ انہوں نے کہا کہ آر جے ڈی ایک ایکسپائر دواکی طرح ہے ، جس نے گزشتہ 15 برسوں میں عوام کا علاج نہیں کیا بلکہ اغوا، رنگداری اور بد امنی کے ذریعے صوبے کو تباہ کر دیا۔ انہوں نے تیجسوی پرساد یادو کے ایک مبینہ انتخابی وعدے کا حوالہ دیتے ہوئے کہا کہ اگر تیجسوی یہ کہہ سکتے ہیں کہ ہر گھر سے ایک شخص کو سرکاری نوکری دیں گے ، تو پھر اقتدار میں آنے کے 20 مہینے بعد یہ وعدہ پورا نہ کرنے پر استعفیٰ دے دیںگے ۔ اجلاس میں پرشانت کشور نے سوراج کے اعلانات کے عملی فائدوں پر بھی زور دیا۔
انہوں نے کہا کہ اگر 14 تاریخ کو جن سُراج کی حکومت بنتی ہے تو چھٹھ کے موقع پر باہر سے آنے والے بچوں کو دوبارہ مزدوری کرنے کے لئے باہر نہیں جانا پڑے گا۔
انہوں نے عوام سے اپیل کی کہ اگر آپ اپنے بچوں کی پیٹھ سے مزدوری کا بستہ ہٹانا چاہتے ہیں تو جن سُراج کے ‘بستہ چھاپ’پر ہی ووٹ دیں۔
