مفاہمت کی تردید کرنے پارٹی قائدین کو سنیل بنسل کی ہدایت
حیدرآباد۔/11 جولائی، ( سیاست نیوز) تلنگانہ میں بی آر ایس کے ساتھ مفاہمت کی شدت کے ساتھ تردید کرتے ہوئے بی جے پی قیادت نے عوام کو گمراہ کرنے کا نیا راستہ اختیار کیا ہے۔ بی جے پی کے قومی جنرل سکریٹری اور تلنگانہ کے معاون الیکشن انچارج سنیل بنسل نے کہا کہ بی جے پی تنہا ہے اور ہم نے الیکشن کیلئے کسی بھی پارٹی سے مفاہمت نہیں کی ہے۔ اسمبلی انتخابات میں پارٹی تنہا مقابلہ کرے گی۔ تلنگانہ پارٹی قائدین کے ساتھ اجلاس منعقد کرتے ہوئے سنیل بنسل نے قائدین کو ہدایت دی کہ وہ بی آر ایس سے مفاہمت نہ ہونے کے بارے میں عوام کو واقف کرائیں۔ انہوں نے کہا کہ کانگریس کی جانب سے مفاہمت کی الزام تراشی سے بی جے پی کے امکانات متاثر ہوسکتے ہیں۔ بنسل نے ریاستی جنرل سکریٹریز اور دیگر عہدیداروں کے ساتھ علحدہ اجلاس منعقد کئے اور کانگریس اور بی آر ایس کے خلاف یکساں طور پر مہم چلانے کا فیصلہ کیا۔ انہوں نے کہا کہ جی کشن ریڈی پارٹی کے نئے صدر کی حیثیت سے انتخابی حکمت عملی تیار کریں گے اور وہ تنہا مقابلہ کے حق میں ہیں۔ پارٹی نے ایس سی، ایس ٹی طبقات کیلئے علحدہ جلسہ عام منعقد کرنے کا فیصلہ کیا ہے۔ جلسہ عام کی تاریخوں کا جلد ہی اعلان کیا جائے گا۔ انہوں نے کہا کہ بنڈی سنجے نے جن علاقوں کا احاطہ نہیں کیا اس کی تکمیل کشن ریڈی کریں گے۔ بی جے پی اعلیٰ قیادت نے تلنگانہ کے قائدین میں اختلافات کی یکسوئی کے لیے جے پی نڈا کی خدمات حاصل کی لیکن کوئی نتیجہ برآمد نہیں ہوا ۔ بتایا جاتا ہے کہ کشن ریڈی سے ناراض قائدین اپنا علحدہ راستہ اختیار کرلیں گے۔ر
