ریاست میں کانگریس کی لہر ، چیف منسٹر کو فارم ہاؤز منتقل کرنے کا عوام ذہن بناچکے ہیں : وجئے شانتی
میدک ۔22 نومبر ۔ ( سیاست ڈسٹرکٹ نیوز ) ریاستی وزیراعلیٰ کے چندرشیکھر راؤ کی دو میعادی حکومت کی کارکردگی صفر کے برابر ہے ۔ مسٹر کے سی آر نے تلنگانہ عوام کے ساتھ دھوکہ کیا ہے ، وہ ایک 420 وزیراعلیٰ ثابت ہوچکے ہیں ۔ کالیشورم پراجکٹ کی تعمیر میں کروڑہا روپئے کا غبن ہے ، کے سی آر کا خاندان ہزاروں کروڑ کی بدعنوانیوں میں ملوث ہے ۔ چیف کوآرڈینٹر برائے انتخابی تشہیر تلنگانہ سابق ایم پی میدک ایم وجئے شانتی نے میدک کے رام داس ایکس وے پر کانگریس امیدوار حلقہ اسمبلی میدک مسٹر مائنم پلی روہت کی انتخابی مہم کے سلسلہ میں منعقدہ روڈ شو و کارنر میٹنگ سے خطاب کرنے کے دوران ان خیالات کا اظہار کیا۔ بی جے پی کو خیرآباد کرتے ہوئے کانگریس میں شامل ہونے والی وجئے شانتی نے کانگریس امیدوار کے حق میں خطاب کرتے ہوئے بتایا کہ بھاجپا اور بی آر ایس کی خفیہ مفاہمت ہے ۔ اس اندرونی مفاہمت میں مجلس کی بھی آکسیجن شامل ہے ۔ انھوں نے وزیراعظم مودی سے سوال کیا کہ تلنگانہ کے بدعنوان وزیراعلیٰ کے خلاف کارروائی کیوں نہیں کی گئی ؟۔ انھوں نے استفسار کیاکہ شراب گھوٹالے میں ملوث دختر کے سی آر کویتا کی گرفتاری کیوں نہیں ہوئی ؟ ۔ انھوں نے کہاکہ تلنگانہ کی عوام کے سی آر کو آرام کرنے کیلئے فارم ہاؤز منتقل کرنے کا ذہن بنالئے ہیں ، اب ریاست میں کانگریس لہر چل رہی ہے ۔ امیدوار حلقہ اسمبلی ملکاجگری مسٹر مائنم پلی ہنمنت راؤ نے کہا کہ کانگریس اقتدار پر آتے ہی انتخابی منشور میں دیئے گئے گیارنٹیز پر صدفیصد عمل آوری کی جائے گی ۔ اس پروگرام کو ریاست کرناٹک کے وزیر سنتوش اور مقامی نوجوان قائد جیون راؤ ایڈوکیٹ نے بھی مخاطب کیا ۔ وجئے شانتی کی میدک آمد پر مقامی قائدین کنڈن سریندر گوڑ، محمد حفیظ الدین نے پارٹی آفس پر خیرمقدم کیا۔ وجئے شانتی مارکٹنگ کمان سے رام داس ایکس وئے تک عوام کے ساتھ پدیاترا میں شامل رہیں۔ وجئے شانتی کی تقریر کے دوران عوام کا بڑا اژدھام موجود تھا جومیدک سے پھر ایک بار ایم پی بننے کا مطالبہ کررہا تھا ۔ اس موقع پر رمیش ریڈی ، محمد افضل ، پربھاکر ریڈی ، وائی لنگم ، اے شیکھر ، پوجا پون ، پرشانت ریڈی ، مسرز احمد علی بیگ ، جلیل عارف ، جی کرشنا ، جی انجنیلو ، جی شنکر ، جی بٹی سلوچنا ، جی جیوتی ، دونتی لکشمی ، ایم لکشمی ، رامچندر گوڑ ، موہن گوڑ ، شیوانی روہت کے علاوہ عوام کی بڑی تعداد شریک تھی ۔