نئی دہلی : کانگریس کے رکن پارلیمنٹ منیش تیواری نے حکومت پر زور دیا کہ وہ پنجاب میں بارڈر سیکورٹی فورس (بی ایس ایف) کے دائرہ اختیار کو 50 کلومیٹر تک بڑھانے کے آرڈیننس کو واپس لے کیونکہ یہ ملک کے “وفاقی ڈھانچے پر حملہ” ہے ۔چہارشنبہ کو لوک سبھا میں وقفہ صفر کے دوران یہ مسئلہ اٹھاتے ہوئے مسٹر تیواری نے کہا کہ 11 اکتوبر 2021 کو مرکزی حکومت نے ایک آرڈیننس جاری کیا تھا۔ یہ بی ایس ایف سے متعلق قانون کے خلاف ہے ۔انہوں نے کہا کہ پنجاب جغرافیائی طور پر ایک چھوٹی ریاست ہے ۔ ایسے میں جب ہم 50 کلومیٹر کی بات کرتے ہیں تو اس کے دائرے میں آدھا پنجاب آتا ہے ۔مسٹر تیواری نے کہا کہ امن و امان ریاست کا موضوع ہے ، اس لیے یہ آرڈیننس وفاقی ڈھانچے پر حملہ ہے اور اسے واپس لیا جانا چاہیے ۔
