ہندوستان سمت سے محروم ہوچکا ہے، تعلیم کے نام پر لوٹ اور بدعنوانی کا دور جاری
لکھنؤ 27 فروری (یواین آئی) سماجوادی پارٹی کے صدر اکھلیش یادو نے جمعہ کو کہا کہ بھارتیہ جنتا پارٹی کوئی سیاسی جماعت نہیں بلکہ ایک گروہ ہے اور اس کی سیاست چالاکی پر مبنی ہے ۔ انہوں نے الزام لگایا کہ بی جے پی فرقہ واریت اور نفرت کی علم بردار ہے اور اس نے اقتدار کے غلط استعمال کے سوا کچھ نہیں کیا۔ پارٹی کے ریاستی دفتر میں سماجوادی پارٹی انٹلیکچول فورم کی میٹنگ سے خطاب کرتے ہوئے اکھلیش یادو نے کہا کہ بی جے پی کی وجہ سے ملک کا جمہوری نظام متاثر ہو رہا ہے اور نئی نسل کو اندھیرے میں دھکیلا جا رہا ہے ۔انہوں نے کہا کہ ایک ترقی پسند معاشرے میں منافقت اورتوہم پرستی کی کوئی جگہ نہیں ہو سکتی۔ ان کے مطابق موجودہ حکومت میں ملک سمت سے محروم ہو چکا ہے ، تعلیم کے نام پر لوٹ مچی ہوئی ہے اور بدعنوانی عروج پر ہے۔ انہوں نے وزیر اعلیٰ پر طنز کرتے ہوئے کہا کہ وہ رخصتی سیاحت پر ہیں۔ انہوں نے سوال اٹھایا کہ جو مفاہمتی یادداشتیں ہو رہی ہیں ان کا مستقبل کیا ہوگا اور موجودہ حکومت کے پاس کتنا وقت باقی رہ گیا ہے ۔ اکھلیش یادو نے کہا کہ بی جے پی کی پالیسی گمراہ کن اورخوفناک ہے اور حکومت نے پورا بازار غیر ملکیوں کے حوالے کر دیا ہے ۔ انہوں نے کہا کہ ہندوستان کی منڈیوں اور زمین پر بیرونی طاقتوں کی نظر ہے اور 2027 میں سماجوادی پارٹی کی حکومت بنانا ضروری ہے ۔ انہوں نے مزید کہا کہ ایک ٹولہ ملک چلا رہا ہے اور اس سے نجات کا راستہ اترپردیش سے ہی نکل سکتا ہے ۔ انہوں نے حکومت سے سوال کیا کہ آزادی کے وقت ملک کا رقبہ کتنا تھا اور آج کتنا ہے ۔ اس موقع پر سماجوادی پارٹی انٹلیکچول فورم کے اراکین نے کہا کہ اکھلیش یادو نے سب کو مساوی مواقع دے کر اور پی ڈی اے کے تصور کو عملی شکل دے کر ڈاکٹر رام منوہر لوہیا کے نظریات کو حقیقت میں بدلا ہے ۔ انہوں نے کہا کہ موجودہ حکومت نے معاشرے کے ہر طبقے کو مایوس کیا ہے اور دانشوروں سمیت تمام طبقات شدید ناامیدی کا شکار ہیں۔ ان کے مطابق جدید معاشرے کے پیغامبر کے طور پر ملک کو اکھلیش یادو پر ہی اعتماد ہے ۔