نئی دہلی۔ 27 فروری (سیاست ڈاٹ کام) حکومت نے سروگیسی ریگولیشن بل 2019 میں تبدیلی کرتے ہوئے بیوہ اور طلاق شدہ خواتین کو بھی سروگیسی کے ذریعہ ماں بننے کا حق دینے کا فیصلہ کیا ہے۔ وزیراعظم نریندر مودی کی صدارت میں مرکزی کابینہ کے اجلاس میں اس بل کی نئی شکل و صورت میں تبدیلی کو منظوری دی گئی۔ اطلاعات و نشریات کے وزیر پرکاش جاوڈیکر نے کہا کہ گزشتہ برس پارلیمنٹ میں پیش بل لوک سبھا میں منظور ہوچکا تھا۔ راجیہ سبھا میں جب بل بحث کیلئے گیا تو وہاں سے غور و خوض کیلئے سلیکٹ کمیٹی کو بھیجنے کا فیصلہ کیا گیا۔ سلیکٹ کمیٹی نے اپنی رپورٹ سونپ دی ہے اور اس کی تمام سفارشات کو قبول کرلیا گیا ہے۔خواتین اور اطفال کی فلاح وبہبود کی وزیر اسمرتی ایرانی نے کہا ہے کہ ایک اہم تبدیلی یہ کی گئی ہے کہ اب بیوہ اور طلاق شدہ خواتین کو سروگیسی کے ذریعہ اولاد حاصل کرنے کا حق ہوگا۔
