حیدرآباد 9 اپریل (یو این آئی) دونوں تلگو ریاستوں تلنگانہ اور اے پی کے بیشتر علاقوں میں درجہ حرارت 40ڈگری درج کیاجارہا ہے ۔ماہ اپریل کے آغاز سے ہی درجہ حرارت میں بتدریج اضافہ ہوتاجارہا ہے اور محکمہ موسمیات نے انتباہ دیا ہے کہ آئندہ دنوں کے دوران درجہ حرارت میں مزید اضافہ ہوگا ۔ محکمہ موسمیات کے مطابق درجہ حرارت معمول سے زائد ریکارڈ کیا گیا ہے ۔ دونوں ریاستوں کے اضلاع کے علاوہ مختلف مقامات پر شدید گرمی کی لہر دیکھی جارہی ہے ۔گرمی سے بچنے کے لئے لوگ مختلف تدابیر اختیار کررہے ہیں ۔دوپہر کے وقت سڑکوں پر ٹرافک میں کمی دیکھی جارہی ہے ۔واٹر کولرس ، ایر کولرس کے علاوہ تھنڈے مشروبات کی فروخت میں بھی کافی اضافہ ہوگیا ہے ۔ڈاکٹرس نے چھوٹے بچوں اور ضعیف افراد کو مشورہ دیا ہے کہ وہ گھروں میں ہی رہیں ۔عوام کا کہنا ہے کہ گذشتہ برسوں کے مقابلے اس مرتبہ گرمی کافی ہے ۔صبح 9بجے سے ہی شدید گرمی کا آغاز ہورہا ہے جو دوپہر میں اپنے عروج پر دیکھی جارہی ہے ۔ ٹھنڈے مشروبات کے ساتھ ساتھ او آر ایس کے پیکٹس ومشروبات کی فروخت بھی بڑھ گئی ہے ۔ڈاکٹرس نے عوام کو مشورہ دیا ہے کہ وہ شدید دھوپ میں باہر نہ نکلیں ۔