حیدرآباد : تلنگانہ ہائی کورٹ کی پہلی خاتون چیف جسٹس ہیماکوہلی نے یوم جمہوریہ کے موقع پر قومی پرچم لہرایا۔عدالت کے احاطہ میں یہ تقریب منعقد کی گئی تھی جس میں ہائی کورٹ کے ججس اور دیگر عہدیدار بھی شریک تھے ۔بعد ازاں تقریب سے خطاب کرتے ہوئے چیف جسٹس کوہلی نے کہا کہ حیدرآباد عالمی ٹکنالوجی کے ساتھ پیشرفت کررہا ہے ۔چاہے کتنی ہی رکاوٹیں ہی کیوں نہ ہوں اسی طرح کے جذبہ کے ساتھ مستقبل میں آگے بڑھنے کی ضرورت ہے ۔انہوں نے کہاکہ کوویڈ 19نے دنیا بھر کو کئی مشکلات سے دوچار کیا۔اس پر قابو پاتے ہوئے ہم آگے بڑھیں گے ۔وبائی مرض کے دوران تلنگانہ ہائی کورٹ نے مختلف تجاویز اور بیداری کے اقدامات میں فعال کردار ادا کیاتھا۔انہوں نے مزید کہاکہ مشکل گھڑی میں بھی عدالتوں نے اپنے فرائض بخوبی انجام دیئے ۔کوویڈ کی صورتحال کے دوران ججس،کورٹ کے اہلکاروں نے کاندھے سے کاندھا ملاکرہمت کے ساتھ کام کیا۔انہوں نے نشاندہی کی کہ سال 2020سے کئی غیرمتوقع چیلنجس ابھرکر سامنے آئے ۔
