اسٹاکہوم:ادب کا نوبل انعام2021 تنزانیہ کے ناول نگار عبد الرزاق گرناہ کو دیا گیا ہے ۔ نوبل انعام کمیٹی کے مطابق سال 2021 کے ادب کے نوبل انعام کیلئے نوآبادیاتی اثرات اور پناہ گزینوں کے مسائل پر تخلیقات کیلئے تنزانیہ کے ناول نگار عبد الرزاق گرناہ کو منتخب کیا گیا ہے ۔ میڈیا رپورٹس کے مطابق عبد الرزاق گرناہ افریقہ سمیت دنیا بھر میں نوآبادیاتی نظام کے اثرات اور پناہ گزینوں کے مسائل کو اپنے ادبی تخلیقات کا حصہ بناتے رہے ہیں، اس کے ساتھ انہوں نے اپنے ملک کی سماجی حالت اور نقل مکانی کے کرب کی کہانیاں لکھیں ، ان کے ایک ناول کا اردو میں ترجمہ یادِ مفارقت کے نام سے ہو چکا ہے۔ عبدالرزاق گرناہ ، نجیب محفوظ اور حان پامْک کے بعد ادب کا نوبل انعام حاصل کرنے والے تیسرے مسلمان ادیب ہیں۔ برطانیہ میں مقیم 72 سالہ ناول نگار نے نوبل انعام ملنے پر خوشی کا اظہار کرتے ہوئے کہا کہ بہت اچھا لگ رہا ہے کہ جو ایوارڈ عظیم مصنفین کو ملا اب مجھے بھی مل رہا ہے۔ آئندہ دنوں میں امن اور اقتصادیات کے نوبل انعامات کے اعلانات بھی کیے جائیں گے۔انعام پانے والوں کو یہ انعامات الفریڈ نوبل کی برسی کے موقع پر 10 دسمبر کو دیے جائیں گے۔
