لکھنؤ، 24 اکتوبر (یو این آئی) اتر پردیش کے نائب وزیراعلیٰ کیشو پرساد موریہ نے کہا کہ جنگل راج کے نئے روپ میں آئے تیجسوی یادو کے مبینہ فرضی وعدوں سے بہار کی عوام کو اب کوئی سروکار نہیں ہے ۔ موریا نے ایکس پر لکھا کہ بہار میں یادو خاندان کی سیاست ہمیشہ جھوٹ اور فریب پر مبنی رہی ہے اور اب عوام اس خاندان کی باتوں سے مکمل طور پر تنگ آ چکی ہے ۔ تیجسوی یادو جن اعلانات اور وعدوں کی بات کرتے ہیں، انہیں پورا کرنے کے لیے بہار حکومت کے اگلے 50 سال کا مجموعی بجٹ بھی کافی نہیں ہوگا۔ انہوں نے کہا کہ تیجسوی یادو پر کانگریس رہنما راہل گاندھی کے گہرے اثرات ہیں۔ اب وہ بھی دن رات جھوٹ بولنے کے سوا کچھ نہیں کرتے ۔ تیجسوی اور راہل دونوں کی سیاست عوام کو گمراہ کرنے اور غیر حقیقی باتیں پیش کرنے پر مبنی ہے ۔ بہار کی عوام ترقی، روزگار اور اچھے انتظامات چاہتی ہے ، نہ کہ پرانے جنگل راج کی واپسی۔ انہوں نے یقین دلایا کہ آنے والے انتخابات میں عوام ایک بار پھر جھوٹی سیاست کو رد کر کے حقیقی ترقی کے راستے کا انتخاب کریں گے ۔
