ٹوکیو۔ 3جولائی (سیاست ڈاٹ کام) جاپان میں شدید بارش کے سبب سیلاب آنے اور مٹی کے تودے گرنے کی وارننگ کے پیش نظر تین بڑے شہروں سے تقریبا 8 لاکھ لوگوں کو منتقل کرنے کا حکم دیا گیا ہے ۔ بی بی سی نیوز کی رپورٹ میں بتایا گیا کہ جاپان کے کیوشو جزیرے پر واقع کاگوشیما سٹی، کریشیما اور ایرا میں باشندگان سے اپیل کی گئی ہے کہ وہ فوری طور سے محفوظ مقامات پر منتقل ہوجائیں۔ وزیر اعظم شینزو آبے نے مذکورہ شہروں کے باشندوں سے کہا ہے کہ وہ اپنی زندگی بچانے کیلئے اقدامات کریں۔ کاگوشیما ڈویژن کے گورنر ستوشی میتازونو نے ملک کے سیلف – ڈیفینس گروپوں سے اپیل کی ہے کہ وہ راحت رسانی کے کاموں میں مدد کریں۔ اس کے علاوہ پڑوسی جزیرے میازاکی کے تقریبا تین لاکھ باشندوں کو نقل مکانی کا مشورہ دیا گیا ہے ۔