نئی دہلی 20 جون (سیاست ڈاٹ کام ) کانگریس جنرل سکریٹری پرینکا گاندھی نے اتر پردیش میں بڑھ رہے جرائم پر تشویش ظاہر کرتے ہوئے آج ریاستی حکومت پر تنقید کی اور کہا کہ اقتدار کی خاطر بی جے پی حکومت جرائم پر خاموشی اختیار کئے ہوئے ہے ۔پرینکا گاندھی نے کہااتر پردیش میں معصوموں پر درندگی اور بربریت جا رہی ہے ۔ عورتوں کو خوف کے ماحول میں ڈھکیلا جا رہا ہے ۔ آدمی کو زندہ جلا یا جا رہا ہے مگر اقتدار کی راگ درباری آنکھیں کچھ نہیں دیکھ رہی ہیں۔ ریاستی حکومت عورتوں اور بچیوں کی حفاظت کی ذمہ داری کب لینا شروع کرے گی۔اس کے ساتھ ہی انہوں نے مختلف اخبارات میں شائع ہونے والی خبروں کے تراشے بھی پوسٹ کئے ہیں جن آگرہ میں بار کونسل کی صدر کا گولی مار کر قتل، علی گڑھ میں خاتون بی ڈی سی کو زندہ جلانے ، گورکھپور میں سات سال کی بچی کے ساتھ زیادتی، رام پور میں شوہر کو درخت سے باندھ کر بیوی کے ساتھ اجتماعی آبروریزی اور بدایوں میں 15 دن تک تھانے کا چکر کاٹنے پر بھی درج نہیں کی عصمت دری کی رپورٹ جیسے کئی واقعات کا ذکر ہے ۔
