اسمبلی اور کونسل کی کارکر دگی سے اسپیکر نے واقف کرایا
حیدرآباد ۔ 28۔نومبر (سیاست نیوز) جرمنی کی برسر اقتدار سوشیل ڈیموکریٹک پارٹی (SDP) کے قائدین کے وفد نے اسپیکر قانون ساز اسمبلی جی پرساد کمار سے ملاقات کی ۔ سوشیل ڈیموکریٹک پارٹی کے سکریٹری جنرل سبینہ فنڈرچ پارٹی کے ایشیا پیسیفک شعبہ کے سربراہ مائیکرو گوندھر ، انڈیا ڈائرکٹر کرسٹوف پی مورے نے اسپیکر اسمبلی سے دونوں ممالک کے درمیان دیرینہ روابط اور مختلف شعبوں میں تعاون پر بات چیت کی ۔ بھونگیر کے رکن پارلیمنٹ سی ایچ کرن کمار ریڈی اور سکریٹری لیجسلیچر نرسمہا چاریلو اس موقع پر موجود تھے۔ اسپیکر پرساد کمار نے جرمنی کے وفد کو بتایا کہ 2014 میں علحدہ تلنگانہ ریاست کے قیام کے بعد قانون ساز اسمبلی و کونسل موثر انداز میں کام کر رہے ہیں۔ انہوں نے دونوں ایوانوں کی کارکردگی اور عوامی مسائل کے حل کیلئے فیصلوں سے واقف کرایا۔ اسپیکر نے کہا کہ اسمبلی میں 119 اور کونسل میں 40 ارکان ہیں۔ عوامی مسائل پر دونوں ایوانوں میں تمام پارٹیوں کو مباحث میں حصہ لینے کی اجازت دی جاتی ہے ۔ اسپیکر نے کہا کہ چیف منسٹر ریونت ریڈی کی قیادت میں تلنگانہ تیزی سے ترقی کی راہ پر گامزن ہے۔ بین الاقوامی اداروں کی جانب سے تلنگانہ میں سرمایہ کاری میں اضافہ ہوا۔ جرمنی کے وفد نے اسمبلی کے مختلف شعبہ جات اور ایوان کا مشاہدہ کیا ۔ اسپیکر نے جرمنی کے وفد کو تہنیت پیش کی۔1
